Додека стручњаците смислуваат кој е најбезбедниот начин за организирање на новата училишна година која треба да почне за три недели, постои страв дека враќањето на децата во училишните клупи може да предизвика нов бран на КОВИД-19.
И додека Министерството за образование и наука засега е со став дека децата од септември треба да почнат со редовна настава, светските стручњаци и натаму спроведуваат истражувања за да утврдат колку децата се подложни на корнавирусот и дали се големи преносители.
Само изминатава недела спроведени се три нови истражувања, а еве кои се најважните откритија.
Нема никаков сомнеж дека и децата може да се заразат со новиот коронавирус, но главно имаат поблаги симптоми во споредба со возрасните. Истражувања во САД покажале дека лица помлади од 18 години чинат помалку од седум проценти од вкупниот број на случаи, а забележани се помалку од 0,1 процент на смртни исходи.
Кога станува збор за симптомите, кај децата тоа најчесто се зголемена телесна темпратура и кашлица. Сепак, тоа што симптомите најчесто се благи, не значи дека детето не може да развие посериозна клиничка слика, но тоа главно се случува кај деца кои имаат некои хронични болести. За самите последици од болеста кај децата, се уште не се знае речиси ништо.
Освен тоа, откриено е дека децата постари од десет години се посклони на инфекција од помалите. Според статистики објавени во САД кои се однесуваат на децата, најголем број на случаи имало меѓу деца на возраст од 15 до 17 години, а преломната возраст која ги зголемува шансите за инфекција е 11 години.
Како и кај возрасните, момчињата почесто се заразуваат од девојчињата.
На научниците и натаму не им е јасно зошто помалите деца се помалку подложни на вирусот, но една од најчесто споменуваните теории е дека почесто се изложени на различни вируси од групата на коронавируси и поради тоа имаат подобар имунитет. Втората теорија произлегува од резултатите на неодамна направена студија која вели дека генот за рецепторот за кој се закачува новиот коронавирус во горните дишни патишта кај децата е послаб.
Кога станува збор за тоа дали децата го пренесуваат вирусот, одговорот е потврден, само прашање е колку. Ново истражување од пред неколку дена покажало дека помладите деца во себе носат повеќе вирус, а со самото тоа и се позаразни.
Децата помали од пет години имале поголема количина на коронавирус во носот и во грлото во споредба со возрасните.
Научниците во истражувањата утврдиле и на која возраст децата се најголеми преносители на КОВИД -19, а тоа е на возраст помеѓу 10 и 19 години, кога вирусот го пренесуваат еднакво како и возрасните.
