Доењето не е само физички чин на хранење, туку претставува и емоционална врска помеѓу мајката и детето. Многу мајки се прашуваат што смеат, а што не треба да јадат додека дојат. Исхраната во овој период не само што влијае на здравјето на мајката, туку и на удобноста, варењето и развојот на нејзиното бебе.
Иако повеќето намирници не треба строго да се избегнуваат, некои би можеле да предизвикаат непријатност кај бебето, да го нарушат сонот или дури и да влијаат на количината на млеко. Порталот „Дејли Мам“ издвои девет намирници и напивки кои, според советите на одредени експерти, треба да се консумираат со голема претпазливост или, уште подобро, целосно да се избегнуваат во овој период.
Кофеинот може да влијае на расположението и сонот на вашето бебе
Ако не можете да го започнете денот без шолја кафе, ова може да биде проблем за вас. Кофеинот се пренесува во мајчиното млеко и може да влијае на бебето. Консумирањето до 300 милиграми кофеин дневно за време на доењето се смета за безбедно за мајките и доенчињата. Прекумерниот внес може да предизвика тешкотии со спиењето, немир, анксиозност, вртоглавица и забрзано чукање на срцето кај мајките.
Кофеинот не се наоѓа само во кафето, туку се наоѓа и во црниот и зелениот чај, чоколадото, енергетските пијалаци и некои газирани сокови. Ако чувствувате потреба за дополнителна енергија, обидете се да преминете на безкофеински варијанти.
Алкохолот може да влијае на моторниот развој на бебето
Иако чаша вино понекогаш може да изгледа како начин за опуштање, алкохолот преминува во мајчиното млеко и може да има негативни ефекти врз бебето. Клиниката Мајо предупредува дека одредени студии покажуваат дека бебињата кои се изложени на алкохол преку мајчиното млеко може да имаат тешкотии во моторниот развој и промени во навиките за спиење.
Доколку планирате да испиете еден пијалак, експертите препорачуваат да почекате два до три часа пред повторно да доите. Алтернативата е измолзувањето, а за безгрижно дружење постојат безалкохолни вина и коктели.
Рибите со висока содржина на жива претставуваат ризик
Рибата е одлична за развојот на мозокот на бебето бидејќи содржи омега-3 масни киселини и протеини, но некои видови риба содржат високо ниво на жива. Според Центрите за контрола и превенција на болести (CDC) „Изложеноста на жива може да влијае на развојот на мозокот и нервниот систем на детето за време на бременоста и по раѓањето“.
Зачинетата храна може да предизвика надуеност
Многу мајки уживаат во зачинета храна, но понекогаш јаките јадења можат да предизвикаат непријатност кај бебето, како што се надуеност и плачење. Ако забележите дека вашето дете станува раздразливо по зачинет оброк, обидете се да ги намалите зачините некое време и следете ја реакцијата.
Преработената и брза храна не е добра ниту за мајките ниту за бебињата
Чипсот, колачињата и брзата храна може да бидат примамливи кога сте исцрпени, но овие намирници често содржат премногу шеќер, заситени масти и адитиви. Редовната консумација може да доведе до недостаток на хранливи материи и да го намали квалитетот на мајчиното млеко.
Повремениот „чит оброк“ не е проблем, но дефинитивно се препорачува да изберете поздрави закуски како што се одредени јаткасти плодови, свежо овошје, јогурт и интегрални храни кои ви даваат енергија без штетни последици.
Некои млечни производи може да предизвикаат непријатност
Некои деца може да реагираат чувствително на протеините од кравјо млеко кои се пренесуваат во мајчиното млеко. Доколку забележите симптоми како што се осип, грчеви, дијареја или крвава столица, контактирајте го вашиот педијатар. Привременото елиминирање на млечните производи може да помогне во дијагностицирање на потенцијална нетолеранција.
Премногу лук може да го промени вкусот на млекото
Лукот е здрав и корисен, но прекумерната консумација може да го промени вкусот на млекото, што некои доенчиња може да го отфрлат. Нема потреба целосно да го прекинувате, но ако забележите дека вашето бебе одбива града по оброк богат со лук, обидете се да го намалите.
Газираните и засладените пијалаци носат празни калории
Слатките и газираните пијалоци содржат големи количини шеќер и не даваат никаква хранлива вредност. Тие исто така можат да предизвикаат надуеност и непријатност. Многу подобар избор се водата, билни чаеви и природни сокови без адитиви.
