Болничарката Ники Јуркуц ги предупредува родителите на бебиња и мали деца да не ги игнорираат симптомите кои може да укажуваат на дехидрација. На нејзината едукативна платформа, Tiny Hearts Education, таа објави дека помалку мокри пелени може да биде знак дека детето е дехидрирано, а тоа се случува многу побрзо кај децата отколку кај возрасните, особено кога се болни.
„Доколку детето не се чувствува добро, родителите треба да следат колку јаде, пие и уринира“, порачува таа и ги повика родителите повеќе да внимаваат на количината на влажни пелени.
„Задолжително внимавајте на тоа кога вашето дете е болно. Нормално е да не сака да јаде, а понекогаш и не пие ако му е лошо“, додава таа.
Покрај апетитот и мокрењето, таа ги советува родителите да ги следат уште некои симптоми. Тоа се суви усни, јазик, уста и грло, гадење, потемна урина или урина со интензивен мирис, плачење без солзи, забрзано дишење и вдлабната фонтанела. На дехидрација укажуваат и летаргија, поспаност, раздразливост, бледило, збунетост, забрзан пулс и студено тело на допир.
Ако детето е помладо од шест месеци, Јуркуц советува да нудите мајчино или вештачко млеко што е можно почесто и да го однесете на лекар. На постарите деца може да им се дава вода или орален раствор за рехидратација на секои четири часа.
„Ако вашето дете е жедно, веројатно е веќе дехидрирано“, предупредува Јуркуц.
Ако сакате да го проверите нивото на хидратација на вашето малечко, нежно стиснете му ја кожата на задниот дел од зглобот. Ако бојата се враќа бавно, можеби е дехидрирано.
