Едно јајце на ден може да им помогне на неухранетите мали деца во нивниот раст до здрава висина, укажува ново истражување. Без разлика дали се работи за меко или тврдо варено јајце, пржено јајце или омлет, тоа дава поттик за растот на децата. Се смета дека јадењето едно јајце на ден е евтин начин да се спречи заостанување во растот.
Инаку, познато е дека првите две години од животот се клучни за растот и развојот на детето. Секое забавување на растот е главно неповратно.
Заедно со инфекциите и болестите, лошата исхрана е главната причина за заостанување во растот кај децата. Според Светската здравствена организација (СЗО), околу 155 милиони деца на возраст под пет години се прениски за нивната возраст. Најголем дел од споменатите деца живеат во неразвиени земји.
Во истражувањето учествувале деца на возраст од шест до девет месеци. По шест месеци следење, било забележано дека децата кои јаделе по едно јајце секој ден имале 47 отсто помала преваленца на заостанување во растот.
Јајцата се сметаат за добра хранлива комплементарна храна која може да се воведе како дел од разновидна исхрана кога мајката ќе одлучи да започне комплементарна исхрана. Секако, никогаш пред четири месеци од животот на детето.
Инаку, комплементарна исхрана или дополнителна исхрана е исхрана со сета течна и цврста храна, освен мајчиното млеко и млечната формула. Периодот на комплементарна исхрана е периодот во кој покрај мајчиното млеко се дава друга храна или течност.
Навременото воведување на комплементарна исхрана е важно од нутриционистички и развојни причини и за навремено преминување од доење во секојдневна семејна храна. Како што расте доенчето, мајчиното млеко престанува да биде доволен извор на енергија, макронутриенти и микронутриенти, а овој недостаток мора да се надомести со комплементарна храна.
СЗО им препорачува на мајките ширум светот исклучиво да ги дојат своите доенчиња во првите шест месеци од животот на детето со цел да постигнат оптимален раст, развој и здравје. По првите шест месеци од животот, на доенчето треба да му се даде комплементарна храна и да продолжи со доење до возраст од две или повеќе години.
Иако јајцата се хранлива намирница, многу е важно малите деца да имаат разновидни намирници во нивната исхрана.
Извор: Pediatrics
