Дури 1 од 7 деца може да имаат симптоми поврзани со коронавирусот неколку месеци откако биле позитивни на тестот за Ковид-19, рекоа во средата авторите на англиската студија за долг Ковид кај адолесцентите.
Децата ретко се разболуваат сериозно од Ковид-19, но можат да страдаат од долготрајни симптоми, а студијата е една од најголемите од ваков вид за тоа колку е вообичаен таканаречениот долг Ковид во оваа возрасна група.
- Студијата, предводена од Универзитетскиот колеџ во Лондон и Јавното здравство во Англија, покажа дека 11-17-годишниците кои биле тестирани позитивно на вирусот имале двојно поголема веројатност да пријават три или повеќе симптоми 15 недели подоцна од оние кои биле негативни
Истражувачите анкетирале 3.065 11-17-годишници во Англија кои имале позитивни резултати на ПЦР-тест помеѓу јануари и март, и контролна група од 3.739 деца на возраст од 11 до 17 години, кои биле негативни во истиот период.
Меѓу оние кои биле позитивни на тестирањето, 14% пријавиле три или повеќе симптоми како што се невообичаен замор или главоболки 15 недели подоцна, во споредба со 7% кои тогаш ги пријавиле симптомите кај контролната група.
Истражувачите велат дека иако наодите сугерираат дека дури 32.000 тинејџери можеби имале повеќе симптоми поврзани со Ковид-19 по 15 недели, преваленцата на долг Ковид во оваа возрасна е помала отколку што се стравуваше минатата година.
Наодите се уште не се рецензирани. Авторите велат дека секоја одлука за проширување на вакцинацијата на деца од 12 до 15 години во Британија најверојатно нема да се заснова на оваа студија, бидејќи нема доволно податоци дали вакцинацијата штити од долг Ковид.
„Добиваме се повеќе докази за безбедноста на вакцината кај деца од 12 до 15 години и тоа најверојатно ќе се земе предвид“, им рече на новинарите Лиз Витакер, педијатар од Империјал колеџ во Лондон. (Еуроњуз)
