♦♦♦♦♦♦♦
Истражувачите ја анализирале крвта на дел од најболните деца и откриле дека тие имаат високи нивоа на пет соединенија кои можат да се измерат при рутински тестови. Две од нив, феритин и Ц-реактивен протеин или ЦРП, се вообичаени крвни маркери за воспаление. Другите, пак, се поврзани со оштетување на срцето и згрутчување на крвта – тропонин, BNP и Д-димери
Лекарите идентификуваа група на соединенија во крвта кои можат да помогнат да се открие кои деца се изложени на најголем ризик од развој на ретка, но опасна по живот имунолошка реакција на коронавирусот.
Новиот синдром се појави минатиот месец откако во болниците во Лондон беа примени повеќе деца на одделенијата за интензивна нега со симптоми кои наликуваа на токсичен шок измешан со воспалително нарушување познато како Кавасаки болест.
Оттогаш болниците низ целиот свет пријавија стотици слични случаи за кои многу лекари веруваат дека се предизвикани од претераната реакција на имунолошкиот систем на вирусот понекогаш и неколку недели по инфекцијата.
Околу 100 деца со оваа болест биле третирани во Велика Британија. Многумина од нив биле примени со перзистентна треска, осип на кожата, болка во стомакот и ладни раце или нозе. Најмалку две деца во Велика Британија починале од ова нарушување, од кои едното било осуммесечно бебе во болницата „Plymouth’s Derriford“ во април.
Истражувачите од „Imperial College London“ ја анализирале крвта на некои од најболните деца и откриле дека тие имаат високи нивоа на пет соединенија кои можат да се измерат при рутински тестови. Две од нив, феритин и Ц-реактивен протеин или ЦРП, се вообичаени крвни маркери за воспаление. Другите, пак, се поврзани со оштетување на срцето и згрутчување на крвта – тропонин, BNP и т.н. Д-димери.
„Знаеме дека овие маркери се присутни кај тешко болните пациенти и кај некои пациенти со нормална Кавасаки болест“, рече Мајкл Левин, професор по педијатрија и меѓународно детско здравје на „Imperial College London“.
„Сметаме дека можат да ни помогнат да одлучиме кои деца се на ризик да прогресираат до срцева слабост. Во суштина, она што го правиме е користење на крвните маркери за да се обидеме да ги одбереме и преместиме оние деца кои имаат потреба од тоа од општите болници во специјалистички центри, а потоа ако е потребно и во единиците за интензивна нега.“
Ќе бидат потребни повеќе истражувања за да се утврди дали маркерите се сигурни. Ако се, лекарите потенцијално би можеле да ги идентификуваат децата со најголем ризик од оваа состојба преку едноставен тест на крвта
Лекарите низ Велика Британија и во различни болници во Европа сега собираат примероци од крв за студијата за да дознаат кои маркери можат да им помогнат да ја предвидат сериозноста на болеста и да ја разберат генетиката на нарушувањето.
„Ова е ситуација која многу брзо се менува и ние очајно треба да научиме како да се справиме, бидејќи сега гледаме значителен број на деца кои се примени во општите болници насекаде“, рече Левин.
„Она што не го знаеме кога ќе видиме дете за прв пат или ќе чуеме за нив ако се наоѓаат во друга болница, е кои деца ќе оздрават сами, а кои ќе прогресираат кон Кавасаки болеста и затоа се изложени на ризик од добивање на аневризми на коронарните артериии, како и кои деца спаѓаат во мал број на пациенти кои ќе прогресираат кон мултиорганско откажување.
Состојбата, именувана како педијатриски воспалителен мултисистемски синдром, наликува на мешавина од токсичен шок и Кавасаки болест. Болеста предизвикува воспаление на крвните садови и во некои случаи го напаѓа срцето. Најсериозни компликации се коронарните аневризми кои можат да бидат фатални. Лекарите обично интервенираат бргу со антиинфламаторни или имуносупресивни лекови.
Лекарите немаат време да спроведат формално испитување за да дознаат кои третмани функционираат најдобро. Наместо тоа, подготвени се планови за меѓународна база на податоци што ќе ја користат за внесување анонимни информации за децата кои се во нивна грижа, вклучувајќи ги и резултатите од тестот на крвта, како и какви третмани се даваат и кога. „Тоа не е добро како рандомизираното истражување, но е најдоброто следно нешто во услови на пандемија. Бидејќи бројките ќе бидат многу големи, тоа може да ни даде сигнал за тоа кои третмани се најдобри“, рече Левин.
Професор Расел Винер, претседател на „Royal College of Paediatrics and Child Health“, рече дека е многу рано да се знае колкав бенефит ќе имаат биомаркерите во крвта за стратификација на децата со новото воспалително заболување.
„Ако Ковид остане со нас некое време, ќе гледаме уште вакви случаи. Затоа, апсолутно ни се потребни начини за рана идентификација околу тоа кои деца би можеле да го имаат ова заболување наспроти дете кое се појавува само со треска, така што биомаркерите може да бидат исклучително корисни на подолг рок.“ (Гардијан)
