Есента и зимата ќе донесат нови предизвици во контролата на ширењето на коронавирусот, бидејќи во исто време „стигнуваат“ и други зимски болести, како што се настинката и грипот, кои можат да го ослабнат имунитетот и да нè направат поподложни на инфекција со коронавирус. Ослабениот имунитет носи поголем ризик од развивање на потешки симптоми на COVID-19. Луѓето кои долгорочно практикуваат здрави навики се во предност, вели молекуларниот биолог д-р Кристијан Рамадан од Универзитетот Оксфорд.
„Кога станува збор за короната, па дури и за „обичен“ грип, досега се покажало дека посериозни компликации почесто се развиваат кај луѓе кои имаат некои хронични заболувања поврзани со ослабен имунитет, како што е дијабетес. Почесто заболуваат постарите луѓе, кои неретко имаат повеќе дијагнози, а честопати не се движат доволно и не се хранат доволно квалитетно, што исто така влијае на имунитетот. На зголемениот ризик секако влијаат и некои дополнителни фактори, како што се дебелината и пушењето, додека здравите животни навики кои долгорочно се практикуваат го намалуваат ризикот, вели тој.
Кога станува збор за короната, па дури и за „обичен“ грип, досега се покажало дека посериозни компликации почесто се развиваат кај луѓе кои имаат некои хронични заболувања поврзани со ослабен имунитет, како што е дијабетес
Тој додава дека наглата промена во навиките во наредниот месец не може да обезбеди сериозна заштита од вирусот, но ако досега сте се хранеле здраво, сте се обидувале доволно да се движите и да се грижите за вашето здравје, дополнителното внимание во наредниот месец или два сигурно може да ви помогне „посилни“ да ги дочекате зимските болести.
На слабеењето на имунитетот најмногу влијаат изложеноста на стрес, како резултат на што се исцрпуваат залихите на вредни хранливи материи во организмот, како и неквалитетната исхрана. Дополнително, може да влијае и недостатокот на престој на свеж воздух, дури и сега заради коронавирусот излегуваме помалку и остануваме повеќе во затворено, што може да биде поврзано со недостаток на витамин Д, еден од многу важните витамини во градењето на имунитетот.
Накратко, за да го зачуваме здравјето важно е да најдеме начин да го елиминираме стресот или подобро да се справиме со него, да се држиме до здрави навики во исхраната и барем неколку пати неделно да побегнеме во природа, блискиот парк, шума и слично, каде што можеме да прошетаме и да бидеме барем умерено активни.
