♦♦♦♦♦♦♦
Хрватската агенција за лекови (ХАЛМЕД) објави дека досега добила вкупно 139 пријави за сомневање за несакани ефекти на вакцината против COVID-19. Тежината на несаканите ефекти досега е оценета за 116 од нив, при што 20 отсто од пријавите се оценети како сериозни, а 80 отсто од пријавите претставуваат несериозни несакани ефекти, наведува ХАЛМЕД
Хрватската агенција за лекови (ХАЛМЕД) објави анализа на собраните информации во врска со безбедноста на вакцината против коронавирус во Хрватска и можните несакани ефекти.
Според соопштението на ХАЛМЕД, најчесто пријавени несакани ефекти се однесувале на локалните реакции, односно болка и отоци на местото на вакцината, проследени со главоболка, покачена телесна температура, замор, слабост, треска/тресење и гадење.
Според анализата на пријавените несакани ефекти на ХАЛМЕД, кај постарата популација биле пријавени помал број на несакани ефекти и не биле сериозни, што е во согласност со податоците од клиничките испитувања
Се наведува дека овие се очекувани несакани ефекти, кои често се јавуваат и се слични на несаканите ефекти од другите вакцини, и најчесто се со благ до умерен интензитет. Минуваат спонтано за неколку дена или со примена на симптоматска терапија (на пример, ладни облоги, лекови за намалување на температура и лекови против болки).
Меѓу сериозните несакани ефекти, најчесто се забележани реакции на преосетливост, кои се манифестирале како осип и свраб кратко време по примањето на вакцината, поради што биле користени антиалергиски лекови по што во сите случаи дошло до закрепнување.
Се работело за возрасни лица – од млади до средна животна доба.
Според анализата на пријавените несакани ефекти на ХАЛМЕД, кај постарата популација биле пријавени помал број на несакани ефекти и не биле сериозни, што е во согласност со податоците од клиничките испитувања.
ХАЛМЕД не примил ниту една пријава на сомневање на несакани ефекти со смртен исход.
Оттаму додаваат дека се примени две пријави за несакани настани, односно настани кои се временски поврзани со употребата на вакцината, а за кои не постои причинско-последична поврзаност со примањето на вакцината. Станува збор за несакани настани со смртен исход кај постари лица со тешка здравствена состојба.
И во двата случаи е утврдено дека причина за смртта е застој на работата на срцето, се наведува во анализата, која ја пренесоа хрватските медиуми, пренесува „Танјуг“.
