Кога станува збор за новиот коронавирус, тој главно се шири помеѓу возрасните и од возрасните членови на семејството на децата. Ширењето на КОВИД-19 меѓу децата или од деца на возрасни е помалку вообичаено, стои во извештајот на Националниот институт за јавно здравје и околина на Холандија.
Овој институт досега има спроведено низа студии за улогата на децата во ширењето на пандемијата. Се покажало дека децата на возраст до 17 години, претставуваат само 1,3 проценти од сите пријавени пациенти со КОВИД-19, иако чинат една петина од населението во Холандија. Само 0,6 проценти од пријавените хоспитализации опфаќале деца помлади од 18 години. Нема податоци за деца кои се починати од КОВИД-19.
КОЛКУ СЕ ПОМЛАДИ, ДЕЦАТА ПОМАЛКУ ЗАБОЛУВААТ
Од 1. Јуни сите Холанѓани со благи симптоми може да се тестираат за коронавирус. Тестирани се и 16.500 деца помали од 12 години: позитивни биле само 0,3 проценти. Тестирани се и над 4.800 деца на возраст од 13 до 18 години и КОВИД позитивни биле 1,4 проценти.
Истовремено тестирани се речиси 14.000 лица кои се занимаваат со образование или деца: од нив, позитивни биле 0,5 проценти. И сите тие проценти се пониски од националниот просек кој изнесува 1,3% позитивни на тестовите.
Собраните податоци покажуваат и дека КОВИД-19 главно се шири помеѓу луѓе на речиси иста возраст, а поретко помеѓу родители и деца од сите возрасни групи.
Следејќи ги изворите и контактите од почетокот на епидемијата, холандските стручњаци откриле дека не се разболел ниту еден контакт на болен пациент помлад од 18 години, додека се разболувале 8,3% од контактите на полнолетните лица.
Во Холандија е покрената и долготрајна студија PIENTER Corona, со која треба да се стекне увид во текот на инфекцијата и развојот на антитела кај тамошната популација во различни возрасни групи. Во студијата учествуваат 6.100 испитаници кои во наредната година и половина, шест пати ќе даваат крв од прст. Целта е да се следи понатамошното ширење на КОВИД-19 и промената во развојот на антитела кај популацијата според возрасната група.
РЕЗУЛТАТИ ОД МЕЃУНАРОДНИ ИСТРАЖУВАЊА
Податоците собрани во Холандија одговараат на меѓународните истражувања кои го потврдуваат нискиот процент на деца помеѓу потврдените пациенти, од еден процент кај малите деца до шест проценти кај постарите деца. Такви истражувања се спроведени во Кина, Јужна Кореја, Италија, Шпанија и во САД.
Се покажало и дека болеста кај децата главно е многу поблага отколку кај возрасните, а најчестите симптоми се кашлица, температура и болка во грлото. Исто така, забележано е дека во светот од КОВИД-19 се починати многу мал број на деца.
Нулти пациенти по правило се возрасните. Исланд тестирал шест проценти од населението и се покажало дека е помала веројатноста дека децата ќе ја шират заразата, сеедно дали станува збор за тестирани поради симптоми или оние кои се сомнителни.
Истражувањето го опфатило и проблемот на враќањето на децата во училиште. Данска, прва ги отвори вратите на образовните институции и никогаш не пријави зголемување на бројот на заразени. Во Австралија заболеле девет ученици и исто толку наставници. Во Ирска не е забележано ширење на заразата меѓу училиштата, заразените три деца се разболеле по контакт со возрасен, надвор од училиште.
ДЕЦАТА МОЖАТ И ВО УЧИЛИШТЕ И НА ИГРАЛИШТА
Со оглед дека децата играат помала улога во ширењето на вирусот, холандските научници велат дека малите деца не мораат строго да се придржуваат до мерките за одржување на растојание од 1,5 метри. Тоа значи дека децата можат да одат во училиште и да си играат надвор. Кон строгите мерки не мора да се придржуваат ниту учениците од основните и повеќето средни училишта, додека оние кои учат во средните стручни училишта и студентите и натаму треба да одржуваат физичка дистанца.
Тоа важи и за наставниците и останатите возрасни лица кои доаѓаат во контакт со учениците. За нив важи правилото од растојание од 1,5 метри, советуваат холандските научници.
