Што и да дофати мало дете, ќе го претвори во играчка и ќе смисли неколку начини како да се забавува со неа. За детето, играта е најприродниот и најпријатниот начин за истражување на светот. И иако имагинацијата на детето е одговорна за забавата во играта, а не конкретна играчка, сепак е важно играчките кои му се на дофат на рацете, да се приспособат на неговата возраст. Теа Кнежевиќ, магистар по психологија и практичар за терапија со игра советува што е најдобро за детето, соодветно на неговата возраст.
ОД РАЃАЊЕ ДО 18 МЕСЕЦИ
Во овој период, мозокот на детето се развива брзо и бара многу сензорни дразби. Децата имаат потреба да допираат, мирисаат, слушаат, гледаат и ставаат нешта во уста. Со други зборови, децата користат различни сензорни системи за да го запознаат и истражуваат светот околу нив. Тие исто така практикуваат моторни вештини: грубо (фрлање или туркање нешто) и фино (попрецизна контрола на прстите). Тие ги учат и односите меѓу нештата, па затоа е важно да се знае дека, колку и да им е тешко на родителите, на оваа возраст детето ќе ја испушти играчката од рака за да дознае што се случува тогаш – играчката паѓа. Иако можеби ни изгледа банално, тоа е важна лекција за детето. Затоа на оваа возраст е добро да му се обезбеди на детето играчки кои стимулираат различни сензорни системи:ж
- играчки со светли, силни бои
- играчки со звуци
- разни тропалки
- играчки од различни материјали и форми
- меки топчиња
- коцки
Притоа, важно е да се следи како детето реагира на светлосни ефекти, звук и други дразби, бидејќи тоа може да им пречи или да ги исплаши исклучително чувствителните деца. Затоа, потребно е да се дозираат дразбите за да не се преоптоварува детето. Секако, важно е играчките да се направени од материјал кој не е штетен за детето и да немаат ситни парчиња што детето би можело да ги голтне.
ОД 18 МЕСЕЦИ ДО 3 ГОДИНИ
На оваа возраст продолжува брзиот развој на мозокот на детето. Покрај областите поврзани со сетилните и моторичките вештини, сè повеќе се развиваат и областите поврзани со социо-емоционалниот развој на детето и областите поврзани со јазикот. Децата на оваа возраст сакаат да се качуваат, трчаат, скокаат, играат криенка, па понекогаш е тешко да излезат од паркот. Сега тие истражуваат како функционираат некои играчки бидејќи ги интересира врската помеѓу причината и последицата. Тие може да бидат заинтересирани за:
- музички инструменти
- материјали за моделирање и други креативни материјали
- пастели
- книги
- сложувалка
- разни коцки за редење
- фигури со форми на луѓе
- фигури на животни
- фигури храна
ОД 3 ДО 6 ГОДИНИ
Децата во овој период подобро ја разбираат, паметат и вежбаат вештината за решавање проблеми. Истовремено се развива и вештината на симболична игра, што значи дека децата можат да играат игри на преправање и замислување „како да“. Се повеќе во играта бараат интеракција со другите, па влегуваат во одредени улоги во кои можат да имитираат ситуации од нивното секојдневие или нешто што си го замислиле. Затоа, на оваа возраст е добро да им се дадат играчки кои можат да се користат на различни начини и за различни цели, наместо оние што можат да се користат само на еден, стандарден начин. За таква игра добро би им дошле различни:
- фигури
- плишани играчки
- комплет за лекар
- куќа за кукли
- кујна
- каса
- облека за маскирање
- топки
- креативни материјали
- разни дидактички играчки
ОД 6 ДО 9 ГОДИНИ
Во овој период децата сè повеќе практикуваат саморегулација и фокусирање на вниманието. Сè уште е актуелна симболична игра, но зголемениот интерес сега оди на соодветниот дел од играта и на надминување на предизвиците. Следејќи ги правилата на играта, децата практикуваат самоконтрола. Тие исто така учат за групните правила и односите со другите. Во зависност од интересите на детето, може да се јават желби за играчки како што се:
- друштвени игри
- комплет монистри од кои детето ќе изработува накит
- микроскоп
- магнети
- карти
На оваа возраст, децата често имаат хоби, на пример да собираат нешто што ги интересира.
