Лицата кои се инфицираат со новиот коронавирус, заразуваат околу половина од членовите на домаќинствата, а возрасните веројатно се позаразни од децата, покажала студија на здравствените власти во САД, објавена завчера.
Повеќе студии во светот се побиделе да го утврдат точниот ризик на трансмисија на вирусот внатре во рамките на едно семејство, но добиле многу различни резултати. Меѓутоа, истите сугерираат дека децата се помали преносители на вирусот, во споредба со возрасните.
Новата студија на Центарот за превенција и контрола на болести на САД (CDC) се темели на проучени 101 случај на коронавирус во два града – Нешвил и Маршфилд, почнувајќи од април оваа година. Научниците ги следеле членовите на нивните семејства ( вкупно 191), барајќи од нив да водат дневник за евентуалните симптоми и самостојно да си земаат примероци во период од 14 дена.
102 случаи од 191 имале позитивен тест, односно 53 проценти од нив. Меѓу 20 иницијални случаи, помлади од 18 години, стапката на секундарна инфекција изнесувала 43 проценти, додека кај возрасните изнесувала 57 проценти. Малиот број на вклучени деца во студијата, оневозможува резултатите да се генерализираат, велат научниците.
Но, авторите на истражувањето сепак заклучуваат: “Доаѓа до значајна трансмисија, без оглед дали лицето кое заразило други е возрасно или дете“.
Центарот за контрола и превенција на болести им препорачува на лицата кои мислат дека се заразени да се изолираат, да спијат во посебна просторија, да користат посебен тоалет и да носат маска.
