Предвремено родените бебиња често мора да поминат одредено време одвоени од нивните родители во одделите за неонатална интензивна нега. За време на нивниот престој, тие можат да бидат изложени на повеќекратни и болни медицински процедури.
Важна е улогата на родителите за време на престојот на бебето на интензивна нега
Д-р Мануела Филипа, авторка на истражувањето од Универзитетот во Џенова, објаснува дека ова истражување не придонесува само за новороденчињата, туку и за нивните родители. Упатува на клучната улога што ја играат гласот на мајката, гласот на таткото и нивното присуство за време на закрепнувањето на бебето на интензивна нега. „Се обидуваме да најдеме нефармаколошки начини за намалување на болката кај овие бебиња“, вели таа.
Таа додава дека многу докази укажуваат на важноста на контактот меѓу родителите и предвремено родените бебиња, а една од причините зошто тоа е важно е приврзаноста. Д-р Филипа објаснува дека нејзиниот тим се фокусирал на говорот на родителите, имајќи предвид дека не е секогаш можно родителите да ги држат своите деца, посочувајќи дека говорот може да биде многу моќен начин за пренесување емоции.
Д-р Филипа и други експерти од Универзитетот во Џенова од детската болница „Босиио Парини“ во Италија и од Универзитетот во Вале д’Аоста во нивниот извештај објавен во научното списание Scientific Reports објаснуваат дека набљудувале реакции на болка кај 20 предвремено родени деца на одделот за интензивна нега нега на новороденчиња. Тоа го провериле со рутинската процедура на боцкање на стапалото на детето и земање неколку капки крв.
Тимот на експерти ги набљудувал реакциите на децата случајно изложени на три различни ситуации: кога мајката му зборува на детето, кога му пее и кога мајката не е присутна. Експертите го мереле нивото на болка кај бебињата врз основа на три индикатори: нивниот израз на лицето, отчукувањата на срцето и нивото на кислород. Изразите на лицето потоа ги проучувале експерти кои не знаеле на која од трите ситуации биле изложени децата.
Нивото на болка се намалува кога бебињата го слушаат мајчиниот глас
Резултатите покажале дека нивото на болка кај бебињата се намалило од 4,5 на 3 (на скала од 0-21) во ситуации кога го слушале гласот на нивната мајка. Авторот на истражувањето вели дека на толку рана возраст ова е многу важна промена во реакциите. „Познато е дека окситоцинот е присутен при развојот на приврзаноста и во мајчината чувствителност. Може да штити и против болки“, вели таа.
Таа додава дека намалувањето на нивото на болка е помалку забележливо во ситуации кога мајките им пееле на своите деца. Ова може да се однесува на „ограничувања во структурата, зборовите, тонот и мелодијата на песните и приспивните песни“. „Клучната порака на истражувањето е важноста да се вклучи гласот на родителите во раните фази на грижата за предвремено родените бебиња. Ова особено се однесува на ситуации кога се изложени на болни третмани. Барем сега знаеме дека родителите имаат влијание врз нивните бебиња на таа возраст и тоа е позитивно“.
