Момчињата кои натрупуваат килограми во раната тинејџерска возраст може да гo изложат своето потомство на поголем ризик од развој на обезност и астма, според ново истражување.
Иако е нормално тинејџерите да се здебелат додека растат, некои деца добиваат прекумерна тежина поради недостиг на физичка активност и зависност од шеќерни и солени грицки.
Сега, експертите открија дека тинејџерите со прекумерна тежина ризикуваат да ги оштетат гените на своите идни деца.
Истражувањето покажува дека овој период од животот, кога се развива спермата, претставува „клучен прозорец на ранливост“ за ДНК.
Тимот од Универзитетот во Саутемптон и Универзитетот во Берген во Норвешка ја анализирал ДНК на 339 парови татковци и нивните деца. Како дел од нивното долгорочно истражување, тие исто така собрале податоци за телесниот изглед на татковците во текот на адолесценцијата.
Експертите откриле дека тинејџерите со прекумерна тежина ризикуваат да ги оштетат гените на своите идни деца. Истражувањето покажува дека овој период од животот, кога се развива спермата, претставува „клучен прозорец на ранливост“ за ДНК
Анализите откриле промени во ДНК кај 1.962 гени поврзани со формирањето на масни клетки и метаболизмот на мастите кај децата на татковци кои добиле прекумерна тежина во тинејџерските години. Овие промени биле поврзани со зголемен ризик од дебелина, како и со астма и послаба функција на белите дробови.
Ефектот бил поизразен кај женските деца отколку кај машките.
„Прекумерната тежина на идните татковци за време на пубертетот беше поврзана со силен сигнал во ДНК на нивните деца, кој исто така беше поврзан со веројатноста нивните деца да имаат прекумерна тежина“, изјави д-р Негусе Тадесе Китаба, еден од авторите на студијата.
„Раниот пубертет, кога кај момчињата започнува развојот на спермата, изгледа е клучен прозорец на ранливост во кој животниот стил може да предизвика епигенетски промени кај идното потомство.“
Машкиот пубертет обично започнува помеѓу 9 и 14 години, со просечен почеток околу 12 години.
Професорката Сесили Свенес од Универзитетот во Берген рече: „Новите наоди имаат значајни импликации за јавното здравје и можат да бидат пресвртница во стратегиите за интервенција во јавното здравје. Тие сугерираат дека неуспехот да се адресира дебелината кај младите тинејџери денес може да го оштети здравјето на идните генерации, дополнително продлабочувајќи ги здравствените нееднаквости во следните децении.“
Кај децата, истражувањата сугерираат дека 70 отсто од обезните малолетници имаат висок крвен притисок или покачен холестерол, што ги изложува на ризик од срцеви заболувања. Обезните деца исто така имаат значително поголема веројатност да бидат обезни и како возрасни. А доколку децата се со прекумерна тежина, нивната обезност во зрелата возраст често е уште поизразена
Кај децата и тинејџерите, БМИ (индекс на телесна маса) се користи за да се утврди дали се со недоволна тежина, здрава тежина, прекумерна тежина или се обезни.
Најновите податоци на НХС покажуваат дека 32 отсто или речиси една третина од децата на возраст од 11–12 години во Англија имаат прекумерна тежина или се обезни. Овој процент опаѓа благо и изнесува 25 отсто кај децата на возраст од 13–15 години.
Експертите неодамна предупредија дека здравјето на тинејџерите е на „пресвртна точка“, и дека некои од главните двигатели на лошото здравје кај младите веќе не се цигарите и алкохолот, туку зголемената телесна тежина и менталните проблеми.
Коментирајќи ги најновите сознанија, професорот Џон Холоуеј, кој исто така бил вклучен во студијата, изјави: „Детската дебелина се зголемува на глобално ниво. Резултатите од оваа студија покажуваат дека тоа не е проблем само за здравјето на сегашната популација, туку и за идните генерации.“
За да му помогнете на тинејџер да ослаби, НХС препорачува комбинација од здрава исхрана и редовна физичка активност. Се препорачуваат постепени промени, како што се воведување на подобра контрола на порциите и наоѓање забавни активности, наместо диети или прескокнување оброци.
Наодите се објавени во списанието на „Nature“ – „Communications Biology“, пренесува „Дејли мејл“.
