Лекарите објаснуваат дека е вообичаено децата да „собираат“ болести од градинка, но оваа година е особено лоша. „Градинката е одлично легло за вируси, а во моментов ги има навистина многу“, изјави за Јаху, д-р Томас Русо, професор и шеф за заразни болести на Универзитетот во Бафало во Њујорк. Детските градинки имаат тенденција да шират многу болести бидејќи децата допираат сè и се допираат едни со други, притоа ширејќи ги бактериите, објаснува д-р Даниел Ганџијан, педијатар во здравствениот центар Провиденс Сент Џонс во Санта Моника.
Малите деца исто така не се добри во дување на носот – тие често избираат да ги користат рацете или облеката за да го избришат носот, а хигиената на рацете кај помладата група на деца исто така не е најдобра, тврди Ганџијан. „Децата ќе го допираат носот со прстите, а потоа ќе ги допираат играчките и другите работи во градинката, пред другите деца да го сторат истото. Тие исто така киваат и кашлаат директно на предмети што ги допираат другите деца“, додава тој.
Доколку се појави треска, дијареја, повраќање, слабост или некој друг симптом што може да укажува на тоа дека детето е болно, родителите не треба да го праќаат во градинка
Што можат да направат родителите?
Лекарите им препорачуваат на родителите да дадат се од себе за да се обидат да ја погледнат добрата страна на детските болести. „Така децата го градат својот имунолошки систем“, вели Ганџијан, но додава дека е повеќе од разбирливо колку е фрустрирачки да се справувате со постојаните болести и отсуства на детето од градинка, особено за родителите кои работат. Но Русо објаснува дека иако вие не можете да ги спречите инфекциите, како родител можете да направите некои работи за барем да ја намалите веројатноста вашето дете да го „фати“ баш секој вирус што ќе се појави во градинката.
Можете да се обидете да го направите следново за да го намалите ризикот од болест за вашето дете, но и остатокот од вашето семејство:
- искапите го детето кога ќе дојде од градинка,
- сменете му ја облеката,
- измијте му ги рацете,
- научете го на правилна хигиена.
Иако звучат како банални и едноставни работи, ова се начините кои педијатрите ги потенцираат како клучни за намалување на ризикот од РСВ, цревни вирози, стрептококи и сите други болести кои се многу чести во групите во градинките.
Никогаш не го праќајте детето со симптоми на болест во градинка
Покрај тоа, Ганџијан ги советува сите родители добро да обрнат внимание на одредени симптоми за да можат брзо да реагираат доколку нивното дете се разболи. Доколку се појави треска, дијареја, повраќање, слабост или некој друг симптом што може да укажува на тоа дека детето е болно, педијатарот нагласува дека родителите не треба да го праќаат во градинка.
„Знаеме дека на вработените родители кои немаат друга помош за чување на децата им е доста тешко да се грижат за своите деца и не смеат да отсуствуваат од работа, но здравјето на детето е сепак на прво место. Исто така, секое испраќање на потенцијално болно дете во градинка сериозно ги загрозува другите деца во колективот, а за жал, многу родители често не размислуваат за тоа“, објаснува тој.
