И покрај порастот на заразата со новиот коронавирус, Европа настојува да се подготви за враќање на учениците во школските клупи. Се намалува бројот на уленици во училниците, се скратува училишниот час и се воведува обврска за носење маски во училиштата.
Многу родители и наставници стравуваат дека тие мерки не се доволно или дека се усвоени предоцна, поради што некои родители одлучиле да не ги праќаат децата во училиште и да ги остават дома.
Давид Родриго, 41 од Шпанија вели дека нема да ги пушти своите два сина во училиште, кои имаат седум и девет години, бидејќи стравува за нивната безбедност.
Иако децата главно имаат послаби симптоми на коронавирусот во споредба со возрасните, тие можат да ја пренесат заразата на постарите членови на семејството кои живеат во исто домаќинство, а кои се “многу, многу ранливи“, вели Родриго кој е претставник на 60 семејства во регионот каде живее, а кои ја имаат истата загриженост.
Тој е уверен дека “децата ќе ги почитуваат правилата за социјална дистанца само во првите 10 секунди“.
Групата на овие родители е само една од многуте во Шпанија кои бараат учениците да ја следат наставата на далечина, се до одобрување на вакцина или терапија против КОВИД-19.
Но шпанската влада инсистира учениците кои не биле во училница од март, да се вратат во училишните клупи во септември. Шпанските здравствени власти најави дека сите деца постари од шест години, цело време мора да носат маски во училиште.
Во Италија, првото европско жариште на новиот коронавирус, децата над шест години ќе мораат да носат маска кога не ќе биде можно да почитуваат физичко растојание, додека во Грчка е воведена обврска за носење маски за сите ученици.
“Важноста на носењето маски во училиште во време на пандемија е очигледна како и врзувањето појас во автомобил или потребата за вакцинирање на вашите деца“, изјави грчката министерка за образование Ники Керамеус.
ПОМАЛИ ОДДЕЛЕНИЈА
Некои земји, го намалија бројот на ученици во училниците за да обезбедат растојание помеѓу нив. Во училниците во Грчка, ќе може да има максимум 17 ученика, а во Србија и во Босна И Херцеговина, најмногу 15.
Властите во Мадрид неделава најавија дека ќе вработат речиси 11.000 наставници и ќе постават импровизирани училници во школските дворови, за да бројот на ученици во одделенијата во основните училишта може да се намали на 20.
ПОКРАТОК УЧИЛИШЕН ЧАС
Другите мерки вклучуваат често миење на рацете и пократко траење на училишните часови. Во БиХ, еден час за децата е најавено дека ќе трае 20 минути.
Италија нарачала 2,4 милиони индивидуални училишни клупи. Грчка, на секое дете во основно училиште ќе му даде шише вода за повеќекратна употреба, за да се избегнат турканици пред школските мијалници.
Но, Германија може да послужи како пример за претпазливост. Властите затворија две училишта на север од земјата на почетокот на август, откако коронавирусот беше откриен меѓу ученици и вработени во установите, само неколку дена по враќање во училишните клупи.
