Нов тест во облик на лижавче се дава во некои австриски градинки како алтернатива на класичниот тест, кој не наидува на одобрување кај најмладите.
Иако децата се поштедени од некои рестриктивни мерки, постојат стравови дека повторното отворање на училиштата и градинките, со појавата на позаразната, британска варијанта на вирусот која е доминантна во дел од европските земји, би можело да го забрза ширењето на коронавирусот кај младите и децата.
Тестовите во облик на лижавчиња ги дизајнираше Мануела Фодингер, раководител на лабораторијата во виенската болница Кајзер-Франц-Џозеф
Тоа може да придонесе за повторен раст на бројот на заразени и да го загрози успехот на досегашната кампања за вакцинација, пишува агенцијата „Франс Прес“.
Со цел да се „следи инфекцијата“ и да се обезбеди „разумна алтернатива за тестирање“, австриската провинција Бургенланд веќе нарача 35.000 тестови-лижавчиња, изјави портпаролот на тамошната регионална влада.
Покраината нарачала вакви тестови по успешниот пилот проект во градинките, а родителите биле писмено известени дека секое дете ќе добие три бесплатни тестови неделно.
На упатството пишува: „Ставете го тестот во уста, цицајте 90 секунди, потоа ставете го тестот во контејнерот, почекајте 15 минути и проверете го резултатот“.
-
По првичното разочарување што немаат силни бои и сладок вкус како вистинските лижавчиња, туку личат на „преувеличен“ класичен тест, таткото и графички дизајнер Доминик Кротчек истакна дека неговото тригодишно дете сепак се навикнало на тестот
„Тука нема проблем – го повторивме денес и функционираше“, рече тој, додавајќи дека „смета дека има смисла да постојат построги контроли во образовниот сектор“.
Тестовите во облик на лижавчиња ги дизајнираше Мануела Фодингер, раководител на лабораторијата во виенската болница Кајзер-Франц-Џозеф. Таа е автор и на едноставен тест со гаргара, кој сега е широко распространет во Австрија.
