Пулмологот од Србија, кој работи во Словенија, Срѓан Лукиќ, на својот Твитер профил објави предупредување за коронавирусот и неговиот сој омикрон, за кој вели дека е „најлошиот омикрон досега“.
„Сојот омикрон BA.5 станува доминантен. Се чини дека е најлошиот омикрон досега, антигенски доста се разликува од варијантата BA.1, за која вакцините допрва треба да пристигнат и не знаеме колку ќе бидат ефективни против BA.5. Вирусот мутира побрзо од производството на нови вакцини“, напиша Лукиќ.
Лекарите повторно повикуваат на носење маски, а еден од советите за сузбивање на новиот седми бран е примањето на четвртата доза вакцина, пишува „Н1“.
Во земјава почнува вакцинација со четврта доза против Ковид-19
Комисијата за заразни болести на вчерашниот состанок ги разгледа заклучоците од Националната комисија за имунизација, во врска со почеток на вакцинација со четврта доза на вакцина против КОВИД-19.
Вакцинацијата со четврта доза посебно се препорачува кај хронично болни, пациенти на дијализа, трансплантирани, онколошки пациенти, имунокомпромитирани и пациенти кои примаат имуносупресивна и имуномодулаторна терапија за која било индикација и кај лица над 60 години
Четврта доза може да примат лицата над 18-годишна возраст, кои примиле три дози вакцина против Ковид-19. Граѓаните од вчера можат да се обратат во вакциналните пунктови, за што не е потребно закажување.
Вакцинацијата со четврта доза е предвидено да се спроведува со мРНА вакцина на Фајзер или Модерна. Препорачаното растојание меѓу трета и четврта, односно бустер доза е најмалку четири месеци.
Вакцинацијата со четврта доза посебно се препорачува кај хронично болни, пациенти на дијализа, трансплантирани, онколошки пациенти, имунокомпромитирани и пациенти кои примаат имуносупресивна и имуномодулаторна терапија за која било индикација и кај лица над 60 години.
Вакцинацијата е најдобра превентивна мерка за заштита од потешка форма на вирусот Ковид-19. Државата располага со доволни количини вакцини, кои се безбедни и ефикасни и ги повикуваме граѓаните да се имунизираат во вакциналните пунктови со вакцина против Ковид-19, со цел да стекнат дополнителен имунитет, се вели во соопштението од Министерството за здравство на РСМ.
