„Градинката е одлично легло за вируси, а во моментов ги има навистина многу“, вели д-р Томас Русо, професор и шеф за заразни болести на Универзитетот Бафало во Њујорк. Детските градинки имаат тенденција да шират многу болести бидејќи децата допираат сè и едни со други, притоа ширејќи ги микробите, објаснува д-р Даниел Ганџијан, педијатар во здравствениот центар Провиденс во Санта Моника.
Малите деца исто така не се добри во дување на носот – тие често одлучуваат да ги користат рацете или облеката за да го избришат, а хигиената на рацете во помладата група исто така не е најдобра, тврди д-р Ганџијан.
„Децата ќе го допираат носот со прстите, а потоа ќе допираат играчки и други работи во градинката, пред другите деца да го направат истото. Тие, исто така, киваат и кашлаат директно на предмети што ги допираат другите деца“, додава тој.
Што можат да направат родителите?
Лекарите препорачуваат родителите да дадат се од себе за да се обидат да ја погледнат добрата страна на детските болести.
„Така децата го градат својот имун систем“, вели д-р Ганџијан, но додава дека е повеќе од разбирливо колку е фрустрирачко да се справуваат со постојаните болести кај децата и отсуствата од градинка, особено за вработените родители. Но, д-р Русо објаснува дека иако не можете да спречите зарази, постојат работи што можете да ги направите како родител за барем да ја намалите веројатноста вашето дете да го фати баш секој вирус што ќе се појави во градинка.
Може да се обидете да го направите следново за да го намалите ризикот од болести на вашето дете, но и остатокот од вашето семејство:
- Искапете го детето кога ќе дојде од градинка
- Пресоблечете му ја облеката
- Измијте му ги рацете
- Учете го на правилна хигиена
Иако звучат како банални и едноставни работи, ова се начини кои педијатрите ги нагласуваат како клучни за намалување на ризикот од РСВ, цревни вируси, стрептококи и сите други болести кои се многу чести во детските колективи.
„Никогаш не праќајте дете со симптоми на болест во градинка“
Освен тоа, д-е Ганџијан ги советува сите родители да обрнат големо внимание на одредени симптоми за да можат брзо да реагираат доколку нивното дете се разболи. Доколку се појави температура, дијареа, повраќање, слабост или некој друг симптом што може да укаже дека детето е болно, педијатарот нагласува дека родителите не треба да го праќа детето во градинка.
„Знаеме дека на вработените родители кои немаат друга помош им е доста тешко да се грижат за децата и не смеат да изостанат од работа, но сепак здравјето на детето е на прво место. Исто така, секое испраќање на потенцијално болно дете во градинка сериозно ги загрозува другите деца во групата и за жал многу родители често не размислуваат за тоа“, објаснува тој.
