Се побројни се истражувањата кои се занимаваат со феноменот на изненадно губење на сетилото на мирис или за вкус, кој се доведува во релација со болеста КОВИД-19, а токму тоа го потврдуваат и студии на неодамна заболени пациенти во Пекинг каде по неколку месеци повторно се појави жариште на коронавирусот во Кина.
“Од 256 слуачи за заболени од КОВИД -19 во Пекинг каде на 11 јуни повторно се појави ново жариште на епидемијата, 33 лица, односно 13% потврдиле дека го изгубиле остетот за мирис, а 21 лице или 8% озјавиле дека новиот вирус влијаел и на губење на сетилото за вкус“, вели д-р Ву Гуоан, потпретседател на болницата Дитан во Пекинг.
Губењето на мирисот или вкусот и во претходни истражувања е потврдено како симптом на КОВИД-19, а во едно меѓународно истражување објавено минатиот месец, откриено е дека кај дури 32% од пациентите во Кина, 69% од случаевите во Германија и 49% од болните во Франција го пријавиле овој феномен.
Истражувањето објавено во списанието “Otolaryngology – Head and Neck Surgery“ се темели на 394 пациенти – 239 од Кина, 39 од Германија и 116 од Франција. Во сите земји кои се проучувани, вкупни 41% или 161 пациент пријавил губење на осетот за мирис или за вкус. Овие две сетилни дисфункции може да претставуваат ран или дури и да бидат единствен симптом на инфекција со SARS-CoV-2, и кај возрасните и кај децата.
Според научниците, губењето на осетот за мирис или вкус може да послужи и како важен критериум за оние пациенти кои покажале многу благи или речиси никакви други симптоми на болеста.
Еден од авторите на истражувањето, проф. Лу Хонгзоу вели дека појавата на овој симптом помеѓу бројот на заразени е различна од земја до земја и поради различните мутации на вирусот или генетската разлика помеѓу заболените.
Многу пациенти кои биле излекувани, а кои како симптом го имале губењето на мирис или вкус, пријавиле дека и повеќе од еден месец по опоравувањето, сетилото не им се вратило во нормала.
Ова сознание, велат научниците, не претставува изненадување, со оглед дека се знае дека привременото губење на мирисот – аносмија, се јавува по одредени вирусни инфекции, но не е јасно зошто некои пациенти долго по почетокот на заразувањето со КОВИД-19 не можат да чувствуваат мириси. Интерсено е дека голем број пациенти не пријавиле дека им е затнат носот, туку дека едноставно не чувствуваат никаков мирис.
Имено, кога заразата со коронавирус ќе престане, отокот во носот се намалува и молекулите на аромата имаат чист пат до своите неоштетени рецептори, а осетот за мирис се враќа во нормала. Но, лекарите се уште немаат одговор зошто кај некои пациенти тоа не се случува, туку со месеци по излекувањето сетилото не им се враќа. Причината, додаваат научниците, може да биде побавно намалувањето на отокот во носот кој е резултат на силно воспаление.
