Додека омикрон сојот на коронавирус се шири во се поголем број на земји, британските научници спроведоа истражување за да утврдат колку се разликуваат симптомите на омикрон од делта сојот што досега беше доминантен.
Податоците до кои дојде компанијата „Zoe and King’s College“, а ги објави Британскиот медицински журнал, покажаа дека најголемиот број луѓе заразени со омикрон сојот на коронавирус од симптоми пријавиле течење на носот, главоболка, замор, кивање и болки во грлото.
Анализата е направена преку апликација меѓу заразените граѓани на Лондон, бидејќи сојот омикрон е поприсутен во главниот град отколку во другите делови на Велика Британија. На списокот на симптоми објавени од британската влада се и покачена температура, кашлица и губење на чувството за мирис и вкус, кои беа најчести симптоми на првата варијанта на коронавирус.
Тим Спектор, научник кој е во првите редови на истражувањата за омикрон, вели дека побарал од британската влада да ја ажурира листата на симптоми уште од појавата на делта варијантата.
„Пораките што ги испратија од владата не беа доволно јасни. Мислам дека повеќето луѓе препознаваат симптоми налик на симптоми на настинка. Јас на тој список едноставно би додал „симптоми налик на настинка“. Мора да ги едуцираме луѓето, да се вратиме на основите и да кажеме: ако имате симптоми на настинка, држете се подалеку од луѓето. Не треба да чекате класични симптоми на Ковид-19“, рече Спектор.
За да ги споредат симптомите на делта и омикрон, истражувачите земале податоци за симптомите на делта сојот од октомври, кога тој сој беше најдоминантен, и актуелните податоци за омикрон сојот. Првата анализа не покажала јасни разлики помеѓу раните симптоми на делта и омикрон.
