Каква е улогата на децата во ширењето на коронавирусот, е една од клучните загатки од првиот ден на пандемијата. Во светот спроведени се само мал број на студии кои се однесуваат на децата и КОВИД-19, а научниците се поделени во поглед на нивната интерпретација.
Повеќето европски земји повторно ги отворија училиштата, но освен најава за можно отворање на градинките, извесно е дека училиштата во земјава ќе останат затворени до крајот на оваа учебна година.
КОЛКУ ДЕЦА СЕ ЗАРАЗЕНИ?
Заклучно со 23 мај во земјава се пријавени 76 случаи на заразени деца со КОВИД-19 на возраст од 0 до 9 години и 92 инфицирани деца на возраст од 10 до 19 години.
Децата претставуваат мал дел од потврдените случаи на КОВИД-19: во Кина, Италија и во САД помалку од два проценти од пријавените случаи на зараза се однесувале на лица помлади од 18 години.
Но, истражувачите се поделени кога станува збор за тоа дали децата се изложени на помал ризик да се заразат со коронавирусот, па потоа да ја шират инфекцијата.
“Се е поголем бројот на докази дека децата се помалку подложни на заразата со новиот коронавирус, имаат поблага инфекција и ретко се одговорни за пренесот на заразата во домот“, вели д-р Аласдаир Мунро од Универзитетот Саутемптон и коавтор на студија која покажала дека децата не се “суперширители“ на коронавирусот.
КОЛКУ ЧЕСТО ДЕЦАТА ГО ПРЕНЕСУВААТ КОРОНАВИРУСОТ?
Студиите за тоа колку често децата ја пренесуваат болеста КОВИД-19 се уште поретки. Истражувачи од Националниот институт за јавно здравје и животна средина во Холандија внимателно анализирале како болеста се ширела во 54 домаќинства составени од 123 возрасни лица и 116 деца на возраст од 16 години и помлади. Тие не пронашле ниту едно семејство во кое детети било првиот пациент.
“Треба да се има предвид дека оваа студија почна откако училиштата беа затворени. Но, постојат дополнителни докази од холандските студии на следење на контактите на заразените лица. Од 43 контакти на заразени деца и тинејџери кои беа следени, ниту еден не е заразен“, вели Сузан ван ден Хоф, епидемиолог во холандскиот Национален институт за јавно здравје.
Кирсти Шорт, епидемиолог во Австралија водела се уште необјавена анализа од земјите кои тогаш немале затворени училишта, како Сингапур. Открила дека ретко децата биле први кои ја внеле заразата со коронавиру во семејниот дом: тоа се случило кај само осум случаи. За споредба, кај птичјиот грип H5N1, децата во 50 проценти од случаевите ја внеле заразата во својот дом.
ШТО ВЕЛАТ ПРОТИВНИЦИТЕ ЗА ОТВОРАЊЕ НА УЧИЛИШТАТА?
Но, некои научници се противат на враќањето на децата во училиптата, и тврдат дека зачестеноста на заразата кај децата е пониска од кај возрасните, токму поради тоа што изминатите месеци децата не биле толку изложени на вирусот, оти училиштата во повеќето земји биле затворени. Плус, децата не се тестираат толку често како возрасните оти имаат поблаги симптоми или воопшто не ги манифестираат.
“Не гледам никаква силна биолошка или епидемиолошка причина поради која би верувал дека децата нема да се заразат. Се додека постои пренос на заразата кај возрасната популација, повторното отворање на училиштата веројатно ќе го олесни и ширењето на болеста, оти се знае дека респираторните вируси кружат во училиштата и во градинките. Останатите респираторни вируси може да се пренесат од возрасни на деца и обратно, така да не верувам дека овој вирус е исклучок“, вели Гари Вонг, експерт за истражување на респираторни болести кај децата во Хонг Конг.
Истовремено, научниците ги проучуваат имунолошките реакции кај заразените деца како би откриле зошто имаат поблаги симптоми отколку возрасните. Студија која неодамна ја објави Lancet Infectious Diseases на основа на анализа на домаќинства во еден град во Кина, покажала дека е еднакво веројатно дека децата помали од десет години ќе се заразат како и возрасните, но притоа нема да развијат тешки симптоми. Од друга страна, студија објавена во списанието Science во која се анализирани епидемиолошки податоци од Хунан, покажала дека дека децата се помалку подложни на инфекцијата од возрасните.Кинеските научници откриле дека на секое заразено дете помалдо од 15 години доаѓаат три заразени лица на возраст од 20 до 64 години.
