Ковид-19 може да предизвика намалување на мозочната маса, да влијае на намалување на сивата материја во областите што ги контролираат емоциите и меморијата, како и да ја оштети областа што го контролира сетилото за мирис, покажало истражувањето на научниците од Универзитетот во Оксфорд.
Научниците објавија дека забележале вакви промени и кај пациенти кои не биле хоспитализирани поради Ковид-19.
За да се дознае дали споменатите последици може барем делумно да се поништат или ќе останат трајни, ќе треба да се направат дополнителни истражувања.
„Располагаме со силни докази за настанување на абнормалности на мозокот по прележан Ковид-19“, напишаа британските научници во студијата објавена оваа недела во списанието „Nature“.
Ковид-19 може да предизвика поголемо губење на сивата материја и оштетување на ткивото во мозокот отколку што природно се случува кај луѓе кои не биле заразени со вирусот, покажала голема нова студија
Дури и во случај на благи форми на болеста, меѓу учесниците во истражувањето е откриено „влошување на извршните функции“ на мозокот, одговорни за фокусирање, планирање, организирање, донесување одлуки и решавање проблеми, а во просек големината на мозокот на испитаниците се намалила помеѓу 0,2 проценти и два проценти.
Рецензираната студија ги испитувала промените во мозокот на 785 пациенти на возраст од 51 до 81 година.
Нивниот мозок бил скениран два пати, а од вкупниот број на испитаници, 400 биле заразени со Ковид помеѓу две скенирања. Второто скенирање било направено во просек 141 ден по првото.
Студијата е спроведена во време кога алфа варијантата на коронавирусот беше доминантна во Велика Британија и малку е веројатно дека биле вклучени пациенти заразени со делта, велат британските научници.
Истражувањето покажало и дека дел од пациентите по прележан Ковид страдале од „мозочна магла“, или од намалено внимание и концентрација, како и од намалена брзина на обработка на информациите и послаба меморија.
Научниците не објавија дали вакцинацијата против Ковид влијаела на оваа состојба, но британската здравствена агенција минатиот месец соопшти дека по проучувањето на 15 претходно спроведени студии, била откриена двојно помала веројатност кај вакцинираните да се развијат долгорочни симптоми на Ковид во споредба со невакцинираните.
