Трудниците заразени со КОВИД-19 и нивните новороденчиња имаат поголем ризик од развој на компликации отколку што досега се знаело, покажала најнова студија на британските научници.
Студијата е спроведена на над 2100 бремени жени во 18 земји, а секоја трудница со КОВИД-19 била споредена со две трудници кои не биле заразени и кои родиле во иста болница и во исто време.
Инфекцијата со новиот коронавирус кај новороенчињата се поврзува со трикратно поголем ризик од здравствени компликации, тврдат научниците од Оксфорд.
“Трудниците заразени со КОВИД-19 имале за 50 проценти повеќе шанси од останатите трудници да развијат компликации, вклучувајќи предвремено породување, висок крвен притисок со затајување на органи, потреба за интензивна нега или смрт“, вели професорот по фетална медицина, Арис Папагеоргиу.
Меѓутоа, се чини дека доењето не претставува ризик бебето да се зарази од мајка која има КОВИД-19, велат научниците.
