Две дози Фајзер вакцина против КОВИД-19 се покажале ефикасни во спречување на развојот на тешка форма на болеста кај децата помеѓу 5 и 11 години откако преовладува омикрон варијантата, но утврдено е дека брзо ја губат способноста за заштита од зараза во таа возрсна група, објавија научниците од Универзитетот во Њујорк.
Според истражувањето кое се уште не поминало стручна рецензија, ефикасноста на вакцините во спречување на зараза се намалила од 68 проценти во средината на декември на 12 проценти на крајот на јануари, во споредба со невакцинираните деца.
Во возрасната група од 12 до 17 години, ефективноста во спречувањето на инфекција се намалила од 66 отсто на 51 отсто во истата временска рамка.
“Овие резултати укажуваат на потребата во пронаоѓање на поинакви начини за дозирање на вакцините за децата, како и на важноста од користење на повисоки нивоа на заштита во спречувањето на инфекции и пренос на болеста, како што е носењето маски“, велат истражувачите.
Во јануари измерено е дека вакцината била 48 отсто ефикасна во спречувањето на хоспитализација на помладата популација и 73 отсто за адолесцентите. Во средината на декември ефикасноста изнесувала 100 отсто кај децата и 85 отсто кај адолесцентите, што значи дека во меѓувреме се намалила.
Д-р Пол Офит, експерт за инфективни болести кај децата во детската болница во Филаделфија, се сомнева дека податоците се доволно веродостојни за да може да се зборува за драстично намалување на ефикасноста на вакцините, особено против тешка форма на болеста.
“Не е изненадувачки што заштитата од блага форма на болеста слабее“, вели д-р Офит. “Знаеме дека омикрон добро го избегнува имунитетот. Целта на вакцината е да ги заштити децата од хоспитализација поради тешка форма на болеста“.
За разлика од децата на возраст од 12 до 17 години и возрасните, кои примаат дози од 30 микрограми од вакцината и можат да се вакцинираат и со третата доза, помалите деца примаат доза од само 10 микрограми.
