Да се биде болен не е пријатно во ниту еден период од годината, но во лето тоа е посебна мака, и за децата и за родителите. И тоа не само поради високите температури кои не опкружуваат, па дете со покачена температура потешко може да се разлади, туку и поради зголемениот ризик од дехидрација.
Иако е лето и владеат високи температури и жештина, кога на детето му ја намалувате температурата со туширање, придржувајте се до правилото тоа да го правите со млака вода, бидејќи така нема да му предизвикате непријатност, а млаката вода и онака е со пониска температура отколку температурата на телото на детето. Главата на детето има голема површина и со ладење на главата побрзо ќе го оладите телото, затоа туширајте ја и главата и телото.
Туширајте го детето со млака вода 5 до 10 минути, а потоа добро исушете го и облечете се во чиста и сува облека. Додека го туширате детето, внимавајте просторијата да не биде премногу разладена со клима уред и детето да не е директно изложено на дувањето од клима уредот.
Ако ставате облоги, најдобро е да користите провриена вода на собна температура. Водата се преврива за да се отстрани хлорот од неа, кој може да ја иритира чувствителната детска кожа. Може да се користи и дестилирана вода. Облогите ставајте ги на градите и стомакот на детето, по можност памучна пелена натопена во млака вода и лесно исцедена. Над неа ставете сува крпа. Облогата менувајте ја на секои 15 минути до половина час, кога целосно ќе се загрее. Исто така, внимавајте детето да не е директно изложено на клима уред.
- Важно е детето да биде доволно хидрирано!
Доколку детето има покачена температура во текот на летото, клучно е да се зголеми внесот на течности во организмот. Обидете се да го натерате детето да пие барем на секој час, а децата под три години и почесто, дури и ако не се жедни. Исто така, можете да му дадете на детето сладолед бидејќи на тој начин ќе добие малку течност, а воедно ќе му ја олесни топлината и ќе му го смири грлото. Ако вашето дете не сака да пие или се сомневате дека е дехидрирано, побарајте лекарска помош.
Прилагодете ја внатрешната температура
Ако ја направите удобна температурата во просторијата каде што детето престојува, многу ќе го олесните закрепнувањето на вашето малечко. Редовно проветрувајте ги собите, особено наутро и навечер кога надворешната температура не е превисока. Во текот на денот спуштете ги ролетните и завесите, вклучете вентилатор и клима уред, но на умерена температура. Секако, детето не смее да биде на директен удар на клима уреди или вентилаторот.
За покривање изберете лесен памучен чаршаф, а детето облечете го во широка и памучна облека.
