Подваријантата BA.2, која многу брзо се прошири во Данска, е попренослива од BA.1 и има уште поголема веројатност дека со неа ќе бидат заразени и вакцинираните, покажало новото данско истражување.
Помеѓу декември и јануари била спроведена студија чија цел било да го анализа ширењето на инфекцијата со коронавирус во повеќе од 8.500 дански домаќинства.
Студијата покажала дека веројатноста лицата заразени со подваријантата BA.2 да ги заразат другите околу себе е за 33 отсто поголема во споредба со лицата заразени со варијантата BA.1. Истражувањето исто така покажало и дека „изворната“ BA.1 предизвикува повеќе од 98 проценти од инфекциите со омикрон, но нејзиниот „близок роднина“ BA.2 брзо стана доминантен вид во Данска, соборувајќи го BA.1 од тронот во втората недела од јануари.
„Заклучивме дека омикрон BA.2 е значително попренослив од BA.1 и истовремено поседува фактори кои го заобиколуваат имунолошкиот систем и со тоа дополнително го намалуваат заштитниот ефект на вакцинацијата против Ковид“, заклучиле научниците кои ја спровеле студијата.
Студијата, која сè уште не поминала стручна рецензија, е спроведена од научници од Statens Serum Instituta (SSI), нивните колеги од Универзитетот во Копенхаген и од данскиот Завод за статистика и Данскиот технички универзитет.
Студијата покажала дека веројатноста лицата заразени со подваријантата BA.2 да ги заразат другите околу себе е за 33 отсто поголема во споредба со лицата заразени со варијантата BA.1
„Ако сте биле изложени на подваријантата BA.2 во вашето домаќинство, веројатноста дека ќе се заразите со неа во рок од една недела изнесува 39 проценти. Вакцините и понатаму имаат важна улога. Ако наместо подваријантата BA.2, сте биле изложени на BA.1 веројатноста да се заразите во рок од една недела изнесува 29 проценти“, објасни водечкиот автор на студијата Фредерик Плеснер, додавајќи дека наодите сугерираат дека BA.2 е околу 33 проценти позаразна од BA.1.
Случаи на подваријантата на омикрон BA.2 се регистрирани и во САД, Велика Британија, Шведска и Норвешка, но во многу помала мера отколку во Данска, каде што тие претставуваат околу 82 проценти од сите пријавени случаи.
Студијата покажала дека и во овој случај оние кои биле целосно вакцинирани, а особено оние кои примиле бустер доза биле помалку подложни на инфекција и пренос на вирус во споредба со оние кои не биле вакцинирани
Студијата, исто така, покажала и дека BA.2 бил релативно поуспешен од BA.1 и кога станува збор за инфекција на луѓе вакцинирани со две дози и оние кои примиле дополнителна бустер доза. Тоа е доказ дека оваа подваријанта има фактори кои го заобиколуваат имунолошкиот систем уште поуспешно од претходните.
Научниците повторно истакнуваат дека вакцините и понатаму имаат многу важна улога во заштитата на поединците.
Студијата покажала дека и во овој случај оние кои биле целосно вакцинирани, а особено оние кои примиле бустер доза биле помалку подложни на инфекција и пренос на вирус во споредба со оние кои не биле вакцинирани.
Прелиминарната анализа на SSI покажала дека нема разлика кога е во прашање ризикот од хоспитализација на лица инфицирани со подваријантата BA.2 во однос на оние кои се заразени со BA.1, пренесува „Ал Џезира“.
