Научниците од Универзитетот Оксфорд развија вакцина против маларија која очекуваат да влезе во употреба следната година, откако тестовите покажаа дека обезбедува до 80 отсто заштита од смртоносната болест.
Вакцината има потенцијал да го промени светот, пренесува „Би-Би-Си“.
- Според оценките на научниците, клучно е тоа што се работи за евтина вакцина и веќе постои договор за производство на повеќе од 100 милиони дози годишно
Хуманитарната организација „Malaria No More“ соопшти дека неодамнешниот напредок значи дека децата би можеле да престанат да умираат од маларија „во нашите животи“.
Беше потребен повеќе од еден век за да се развијат ефективни вакцини бидејќи паразитот што предизвикува маларија, кој се шири со каснување од комарец, е исклучително сложен и недофатлив. Тоа е мета која постојано се движи и ја менува формата во телото, поради што е тешко да се направи заштита.
Светската здравствена организација минатата година донесе историска одлука и одобри првата вакцина која ја разви британската компанија GSK да се користи во Африка. Тимот од Оксфорд тврди дека нивниот пристап е поефикасен и дека новата вакцина може полесно да се произведе во многу поголеми количини.
Резултатите од испитувањето на 409 деца во Наноро, Буркина Фасо, се објавени во списанието „Lancet Infectious Diseases“ и покажуваат дека три почетни дози проследени со бустер една година подоцна дава до 80% заштита.
