Нова студија спроведена на речиси 20.000 деца во Кина покажала дека местото на растење може значително да влијае врз менталното здравје на децата, но на различни начини.
Истражувачите утврдиле дека децата од руралните краишта почесто страдаат од депресија, чувство на осаменост и емоционални тешкотии, додека кај децата од урбаните средини се поизразени проблемите во однесувањето, како што е АДХД (нарушување на вниманието и хиперактивност). Резултатите од истражувањето, објавени во списанието Pediatric Investigation, укажуваат на тоа дека притисоците од урбаниот живот – од училишниот стрес до забрзаниот начин на живот – придонесуваат за поголема зачестеност на проблемите во однесувањето кај градските деца. Од друга страна, децата од село почесто се соочуваат со емоционални тешкотии поврзани со сиромаштијата, изолацијата и одвојувањето од семејството, пренесува Euronews.
Момчињата се почувствителни на влијанието на околината
Истражувачите анализирале податоци од речиси 20.000 ученици на возраст од 6 до 16 години од градските и селските училишта ширум Кина и забележале големи разлики во психолошката состојба и однесувањето на децата, во зависност од тоа каде живеат.
Кај децата од руралните средини забележани се повисоки нивоа на анксиозност, депресија, социјална повлеченост, телесни тегоби поврзани со стресот и проблеми со вниманието.
Резултатите од истражувањето, објавени во списанието Pediatric Investigation, укажуваат на тоа дека притисоците од урбаниот живот – од училишниот стрес до забрзаниот начин на живот – придонесуваат за поголема зачестеност на проблемите во однесувањето кај градските деца. Од друга страна, децата од село почесто се соочуваат со емоционални тешкотии поврзани со сиромаштијата, изолацијата и одвојувањето од семејството
Истражувачите посебно анализирале група од 3.003 ученици кај кои било дијагностицирано некое ментално нарушување. Во таа група, разликите меѓу градските и селските деца биле уште поизразени. Студијата наведува дека децата од руралните средини со ментални нарушувања почесто покажувале симптоми на повлекување и депресија, проблеми во социјалните односи, нарушувања во мислењето, агресивно однесување и склоност кон кршење на правилата. Кај градските деца почесто биле присутни телесни симптоми поврзани со стресот и агресивност. Еден од поинтересните наоди се однесува на полот. Кај момчињата се воочени големи разлики во психолошките симптоми во зависност од тоа дали живеат во град или на село, додека кај девојчињата такви разлики не се забележани. Истражувачите сметаат дека ова покажува оти менталното здравје на момчињата е поосетливо на разликите во опкружувањето и дека поддршката и третманите би требало да бидат прилагодени на таа фактичка состојба.
Зошто доаѓа до овие разлики? Истражувачите наведуваат повеќе можни причини. Децата во руралните делови на Кина често живеат во потешки социоекономски услови и имаат послаб пристап до образование и услуги за ментално здравје. Посебен проблем претставуваат таканаречените „оставени деца“ – дечиња чии родители заминуваат да работат во градовите, па ги одгледуваат баби, дедовци или други роднини. Студијата наведува дека таквите околности можат кај децата да предизвикаат чувство на занемареност, депресија и други психолошки проблеми.
Истражувачите анализирале податоци од речиси 20.000 ученици на возраст од 6 до 16 години од градските и селските училишта ширум Кина и забележале големи разлики во психолошката состојба и однесувањето на децата, во зависност од тоа каде живеат
Кај градските деца притисоците доаѓаат од друга насока. Истражувањето истакнува дека големите очекувања на родителите поврзани со училишниот успех, заедно со многу компетитивниот образовен систем, можат да придонесат за почесто препознавање и дијагностицирање на АДХД и слични нарушувања во однесувањето. Авторите на студијата порачуваат дека овие регионални разлики бараат различни пристапи и мерки на поддршка прилагодени на специфичните проблеми на секоја средина. Според нивното мислење, подоброто насочување на ресурсите би можело да придонесе за создавање поефикасен и подостапен систем за заштита на менталното здравје на децата.
Ограничувања
Важно е да се напомене дека студијата има одредени ограничувања. Менталното здравје на децата било проценувано со помош на само еден инструмент, што можеби не дава целосна слика. Исто така, истражувањето претставува само „пресек на моменталната состојба”, а не долгорочно следење, па не може да покаже како овие обрасци се менуваат во текот на растењето, ниту пак може да утврди дали раната помош може да ги подобри исходите. Податоците се собрани во само една покраина во Западна Кина, па иако резултатите се многу интересни, не мора да значи дека можат да се применат на цела Кина, а уште помалку на остатокот од светот.
