Европските земји бележат значителен пораст на случаите на Ковид-19 предизвикани од високо заразните подваријанти на омикрон, што ги зголемува стравувањата од нов бран со оглед на падот на заштитата што ја обезбедува вакцината против Ковид-19 и почетокот на летната сезона на патувања, јавува „Си-Ен-Ен“.
Според новата студија објавена во „New England Journal of Medicine“ нивоата на неутрализирачки антитела предизвикани од претходна инфекција или вакцинација се неколку пати пониски кај подваријантите BA.4 и BA.5
Европскиот центар за превенција и контрола на болести (ECDC) предупреди минатата недела дека „зголемувањето на нивото на инфекции пријавено за (омикронските подваријанти) BA.4 и BA.5 укажува дека тие ќе станат доминантни“ низ Европската унија и веројатно ќе резултира со зголемување на бројот на случаи.
Инфекциите се во пораст во неколку земји, вклучително Португалија, Германија, Франција, Грција, Австрија, Италија, Швајцарија и Шпанија, според проектот „Нашиот свет во податоци“ (OWID) на Универзитетот Оксфорд, кој ја следи пандемијата.
Новите студии покажаа дека омикронските подваријанти BA.4 и BA.5, во споредба со претходните, поумешно го избегнуваат имунолошкиот систем. Ова значи дека ниту претходните инфекции ниту вакцините не обезбедуваат особено силна заштита од подваријантите што ги прави доминантни.
- Сепак, изгледа дека BA.4 и BA.5 не водат до тешка болест. Меѓутоа, како и кај претходните бранови, зголемувањето на случаите може да резултира со зголемување на хоспитализациите и смртните случаи, објави ECDC
Имено, според новата студија објавена во средата во „New England Journal of Medicine“, пренесува „Си-Ен-Ен“, нивоата на неутрализирачки антитела предизвикани од претходна инфекција или вакцинација се неколку пати пониски кај подваријантите BA.4 и BA.5 во споредба со изворниот коронавирус.
„Забележавме трикратно намалување на титрите на неутрализирачките антитела предизвикани од вакцинација и инфекција против BA.4 и BA.5 во споредба со подваријантите BA.1 и BA.2, кои се веќе значително пониски од изворните варијанти на вирусот“, одговори д-р Ден Барух, автор на трудот и директор на Центарот за вирусологија и истражување на вакцини во медицинскиот центар „Бет Израел Диконес“ во Бостон.
„Нашите податоци сугерираат дека постои можност новите подваријанти на омикрон да доведат до зголемување на инфекциите кај популациите со високи нивоа на имунитет добиен од вакцини, како и кај оние со природен имунитет на BA.1 и BA.2“, напиша Барух.
„Сепак, имунитетот стекнат со вакцината најверојатно ќе продолжи да обезбедува значителна заштита од тешка болест кај оние кои се заразени со подваријантите BA.4 и BA.5“, додаде тој.
