На Универзитетската клиника за гинекологија и акушерство (ГАК) во Скопје е регистрирано новороденче позитивно на COVID-19. Дел од медиумите објавија дека ќе се испитува дали станува збор за прв случај на вертикална трансмисија на коронавирусот, но можноста бебето да се заразило во утробата или при раѓањето категорично ја демантираше директорката на ГАК, Викторија Јовановска.
„Во случајот мајката имаше контакт со бебето. Бебето е тестирано после контактот со мајката, значи сепак, не се работи за вертикална трансмисија, туку контактот мајка-дете си го направило своето. Се е во ред, нема никакви отстапувања, немаат никаква клиничка симптоматологија за инфекција со COVID-19. Тие се испратени дома во изолација. Значи мајката и бебето се добри и се испишани за дома“, изјави за „Канал 5“ Викторија Јовановска, директорка на ГАК.
„Досега нема објавен случај за таква вертикална трансмисија, можно е преку доењето. Нека стигнат контролните тестови, па да видиме за што точно станува збор“, додаде денеска министерот за здравство доц. д-р Венко Филипче.
Препораките на СЗО и УНИЦЕФ се стандардизирани за ИСХРАНА СО МАЈЧИНО МЛЕКО кај мајки суспектни или COVID-19 позитивни
Досега не е забележан ниту еден случај на доење како начин за пренос на COVID-19 кај новороденчето. Тоа го потврдија многубројни студии, а најновата беше објавена во понеделникот во стручното списание „Frontiers in Pediatrics“.
Мајчиното млеко е безбедно и ако мајката е заразена со коронавирус, тој не се пренесува на новороденчето преку доењето, се резултатите од истражувањето спроведено од експерти од Одделот за неонатологија на Универзитетот во Торино. „Микробиолошките анализи покажаа дека коронавирусот не се пренесува од мајката на бебето преку доење, што е многу важен наод“, истакна професорот Дејвид Лембо, директор на Универзитетската лабораторија за молекуларна вирусологија, кој го водеше истражувањето. Притоа мајките позитивни на COVID-19 се придржувале до сите здравствени мерки – користеле маски за лице, одржувале хигиена на рацете и редовно ги дезинфицирале предметите што ги користеле. Ниту едно бебе не се заразило со COVID-19.
Препораките на СЗО и УНИЦЕФ се стандардизирани за ИСХРАНА СО МАЈЧИНО МЛЕКО кај мајки суспектни или COVID-19 позитивни.
