Клучни точки:
- Можно е да овулирате и да забремените повторно три недели по породувањето – дури и пред да ви се врати менструацијата.
- Доењето може да го одложи враќањето на овулацијата, но тоа не е сигурен метод за контрацепција.
- Доколку сте имале предвремено породување, повторното забременување во рок од шест месеци го зголемува ризикот од повторно предвремено породување до 47 %.
- Доколку сте имале царски рез, повторното забременување пред да поминат 18 месеци тројно го зголемува ризикот од руптура на матката доколку дојде до породилни болки.
- Од суштинско значење е да направите план за контрола на раѓање.
♦♦♦♦♦♦♦
Неодамна сте се породиле и се чувствувате подготвени повторно да го зголемите семејството? Се прашувате која е идеалната временска разлика помеѓу вашите деца? Имајте на ум дека повторната бременост без доволно време за закрепнување од претходното породување може да претставува ризик и за вас и за новото бебе. Наоружајте се со факти, за вашата понатамошна бременост да биде што е можно побезбедна.
Може ли да забременам веднаш по породувањето?
Можете да овулирате и да забремените веќе три недели по породувањето. Тајмингот зависи од различни фактори, вклучувајќи го и тоа како вашето тело се опоравува од породувањето. Секое женско тело е различно. Кај некои жени, потребно е подолго време да се врати менструацијата. Кај жените што не дојат, менструацијата обично се враќа околу 12 недели по породувањето.
Што ако дојам?
Доењето може да го одложи враќањето на овулацијата, зависно од тоа колку често вашето бебе цица. Доењето на барање во текот на денот и ноќта го зголемува нивото на хормонот пролактин, кој ја спречува овулацијата.
Повеќето бебиња во САД започнуваат да јадат цврста храна и почнуваат поретко да цицаат околу шестмесечна возраст. Исто така, се препорачува бебињата да спијат подолго во текот на ноќта. Под тие услови, овулацијата обично се враќа околу шест месеци, кога започнува одвикнувањето од доењето. Студија на „ловци-собирачи“ кои практикуваат доење на барање во текот на денот и ноќта, покажала дека овулацијата е одложена од една до две години, а можеби и подолго.
Според Американскиот колеџ на гинеколози, доењето треба да се смета за клучен дел од одржувањето на здравјето помеѓу бременостите. Доeњето меѓу бременостите, овозможувањето време за телото да закрепне и соодветната исхрана се неопходни за поддршка на здравјето во идните бремености.
Во неодамнешна студија, истражувачите откриле дека ако 90 % од жените дојат ексклузивно во текот на шест месеци, со продолжување на доењето до една година по породувањето, би се спречиле:
- 5,023 случаи на рак на дојка годишно;
- 12,320 случаи на дијабетес тип 2 годишно;
- 35,982 случаи на висок крвен притисок годишно;
- 8,487 срцеви удари годишно.
Доењето може да го одложи враќањето на овулацијата, зависно од тоа колку често цица вашето бебе. Доењето на барање во текот на денот и ноќта го зголемува нивото на хормонот пролактин, кој ја спречува овулацијата
Експертите препорачуваат да земате пренатални витамини и да се храните здраво додека доите. Доколку планирате повторно да забремените, осигурајте се дека земате пренатален витамин со најмалку 400 микрограми фолна киселина дневно, почнувајќи барем еден месец пред повторната бременост.
Иако доењето може да го одложи враќањето на овулацијата, тоа не е сигурен метод на контрацепција. Поради различни фактори во вашиот начин на живот, вашето тело и распоредот на хранење на вашето бебе, овулацијата може да започне во секое време. Овулацијата може да се случи пред да се врати менструацијата, па можеби нема ни да знаете дека сте во плоден период за зачнување.
Дали е безбедно повторно веднаш да забременам?
Забременувањето веднаш по породувањето е можно, но доаѓа со зголемени ризици. Студиите покажуваат дека ризикот се зголемува ако има помалку од 18 месеци помеѓу бременостите, а уште повеќе ако поминале помалку од шест месеци. Американскиот колеџ на гинеколози препорачува да се почека најмалку 18 месеци помеѓу бременостите за најдобри исходи.
Кои се ризиците?
- Предвремено породување. Доколку сте имале предвремено породување, ризикот од повторно предвремено породување се зголемува од 14-47 % ако повторно забремените веднаш.
- Руптура на матката. Доколку сте имале царски рез, ризикот од пукање на матката при породилни болки е тројно поголем ако поминале помалку од 18 месеци од последната бременост.
- Опасност по живот. Пукањето на матката е опасно и за мајката и за бебето. Исто така, постои поголема веројатност да имате потреба од трансфузија на крв и побавно закрепнување.
Една од три бремености што следат по друга бременост во САД започнува во рок од 18 месеци од породувањето. До 45 % од бременостите во САД се непланирани. Без разлика дали го планирате вистинското време за следната бременост или не сте сигурни дали сакате повторно да забремените, важно е да разговарате со вашиот лекар за соодветната опција за контрацепција.
Важно е да направите план за план за контрола на раѓање, за да не останете бремени веднаш по породувањето. Разговарајте со вашиот лекар за вашите опции и тајминг за следно дете. (Health news)
