Американската агенција за храна и лекови (ФДА) го одобри првиот орален лек за третман на постпородилна депресија. “Zurzuvae“ (zuranolone) е првиот и единствен орален лек за постпородилна депресија, кој се зема еднаш дневно во текот на лекувањето кое трае 14 дена и може да доведе до брзо подобрување на состојбата.
Досега, лекувањето на постпородилната депресија во САД беше можно само преку интравенска администрација на лекот во здравствените установи. Новиот лек би требало да биде достапен во последниот квартал од 2023 година.
Постпородилната депресија е значајна депресивна епизода која обично се јавува по раѓањето на детето, но може да започне и во подоцнежните фази од бременоста. Исто како и другите видови на депресија, симптомите на постпородилна депресија вклучуваат тага, губење на енергија, суицидални мисли и намалена способност за доживување задоволство, наведува ФДА. Се проценува дека една од седум жени искусуваат симптоми на постпородилна депресија само во САД.
„Постпородилната депресија е потенцијално опасна по живот состојба во која жената чувствува тага, вина, безвредност – во потешки случаи, мисли да си наштети себеси или на бебето“, вели Тифани Фарчионе, шеф на психијатрија во Центарот за проценка и истражување на лекови на ФДА.
„И, бидејќи постпородилната депресија може да го наруши односот мајка-дете, може да има последици и врз физичкиот и емоционалниот развој на детето“.
Пристапот до орални лекови ќе биде корисен за многу жени „кои се справуваат со екстремни и понекогаш опасни по живот чувства“, додаде таа.
Клиничките испитувања покажале дека таблетата значително ги намалува симптомите на депресија во рок од три дена. Ефектот на лекот трае четири недели по последната доза, соопшти ФДА.
