Со обдукција на белите дробови на пациенти кои починале како последица на КОВИД-19, патолозите во повеќето случаи откриле трајни и големи оштетувања, а тоа сознание на научниците може да им помогне да сфатат што се крие зад синдромот познат како “долг КОВИД-19“, за време на кој пациентите со месеци страдаат од непрекинати симптоми на болеста.
Научниците кои го спровеле истражувањето велат дека откриле некои единствени карактеристики на SARS-CoV-2, вирусот што ја предизвикува болеста КОВИД-19, што би можело да разјасни зошто е во состојба да нанесе таква штета.
“Наодите укажуваат на тоа дека КОВИД-19 не е само болест предизвикана од смрт на клетките заразени со вирусот, туку веројатно е и последица на тоа што абнормалните клетки долго остануваат во белите дробови“, вели Мауро Џака, професор на Кралскиот колеџ во Лондон и коавтор на студијата.
Тимот научници помеѓу февруари и април 2020. Анализирал примероци од ткива од бели дробови, срце, црн дроб и бубрези кај 41 починат пациенти од КОВИД-19 во италијанската Универзитетска болница во Трст.
Проф. Џака вели дека иако тој и неговите колеги не откриле очигледни знаци на вирусна инфекција или постојано воспаление на остантите органи, утврдиле “големи оштетувања на структурата на белите дробови“, при што “ткивото преполно со лузни и оштетувања речиси во целост го заменило здравото ткиво“.
“Претпоставуваме дека една од причините за т.н. долг КОВИД-19 е значајното и трајно уништување на здравото белодробно ткиво. Дури и ако пациентот се опорави од последиците од болеста, штетата што ја направил КОВИД-19 може да биде голема“.
Се поголем број на докази од целиот свет упатуваат на тоа дека помал број на пациенти кои се опоравиле од КОВИД-19 и кои се сметаат за излекувани од почетната инфекција, потоа може да чувствуваат низа трајни симптоми, како замор, отежнато дишење и т.н. ментална магла која не е препознаена медицинска состојба, но е се попопуларен назив за група на симптоми која покрива ниско ниво на енергија, раздразливост, замор, проблеми со концентрацијата, главоболки, заборавеност, недостаток на мотивација, депресија, анксиозност и збунетост. Таквата состојба често се нарекува “долг КОВИД-19“.
Проф. Џака вели дека кај речиси 90 отсто од 41 пациент воочени се неколку карактеристики единствени за КОВИД-19 во споредба со други форми на воспаление на белите дробови.
Една од нив е значајно згрутчување на крвта во белодробните артерии и вени, а во други некои белодробни клетки биле абнормално големи и имале многу јазли, што е последица на спојување на различни клетки во одделни големи клетки во процесот познат како создавање на синциции.
Резултатите од истражувањето објавени во стручното списание Lancete BioMedicine укажуваат на тоа дека коронавирусот и натаму бил присутен во бројни типови на клетки.
“Присутноста на овие заразени клетки може да предизвика големи структурни промени воочени во белите дробови кои може да потраат и со недели или со месеци, и на тој начин би можеле и да го објасниме долгиот КОВИД“, вели Џака.
