Како што сезоната на грип повторно зема замав, советите на една педијатрка од Бостон станаа вирални. Д-р Лиах Рапапорт, клинички педијатар во Детската болница во Бостон, зборува за работи што би сакала да им ги каже на родителите – кога не би се плашела, како што сама вели, „да им ги повреди чувствата“.
Таа за познатото списание Њузвик објасни дека секоја есен е преплавена со прашања од загрижени родители за вирусните симптоми. „Исти теми се повторуваат одново и одново“, вели таа. „Родителите се уморни, збунети и се обидуваат да донесат исправна одлука во море од контрадикторни совети. Сакав одговорите што ги давам секојдневно да ги ставам на едно место, на ист директен начин како што би им кажала на пријателка која само сака вистина без медицински жаргон“, додава.
17 корисни совети од педијатричка за родители:
- Детето ќе се разболува често. Тоа не значи дека неговиот имунолошки систем е слаб, туку дека работи токму онака како што треба.
- Имунитетот се гради така што детето ќе се разболи и ќе закрепне, а не преку додатоци во исхраната или сокови.
- Јаслите или градинката не го прават детето болно, туку го изложуваат на вируси со кои сепак ќе се сретне.
- Кашлицата што трае три недели по вирусна инфекција е нормална, како и слузта што постојано ја бришете.
- Антибиотици не лекуваат вируси. Давање антибиотици „за секој случај“ не спречува компликации, туку ја зголемува отпорноста на бактериите и подоцна предизвикува проблеми со варењето.
- Следете го детето, а не само термометарот. Ако има добра енергија и пие доволно течности, најверојатно е во ред.
- Покачената температура не е секогаш опасна. Таа значи дека телото се загреало за да се бори против инфекцијата.
- Целта е детето да се чувствува подобро, а не термометарот да покаже совршен број. Затоа не е потребно да давате парацетамол и ибупрофен наизменично.
- Децата кашлаат за да ги заштитат белите дробови. Обидите да се запре секоја кашлица најчесто не се корисни.
- Ако поминале четири дена од кога сите се здрави, тоа значи дека сте на вистинскиот пат за зимата.
- Кога родителите велат дека детето им е болно три месеци без престанок, тоа обично значи дека детето имало пет различни вируси по ред. Се чувствува исто, но не е опасно.
- Немојте да ја дезинфицирате целата куќа. Тоа само ќе ви ги исуши рацете и ќе го празни џебот.
- Медот, физиолошки раствор, овлажнувач на воздух и трпеливост често помагаат повеќе од повеќето лекови во сезона на вируси.
- Имуниот систем може да се поддржи со сон, здрава исхрана, внес на течности и вакцини.
- Вакцините против RSV, грип се достапни и децата безбедно можат да ги примат за време на истиот преглед кај лекарот.
- Ако детето не јаде многу кога е болно, најважно е да пие доволно течности.
- Секогаш можете да се јавите кај педијатар ако ви треба потврда дека е сè во ред. Тоа не е претерување, тоа е одговорно родителство.
