Бремените жени често се прашуваат кога треба да почнат да вежбаат. Канадскиот физијатар Мари Клод Леблан, смета дека трудниците може да вежбаат за време на целата бременост, односно од самиот почеток, но во текот на првите два месеци да избегнуваат скокање. Ова пред се се однесува на активните спортистки и оние жени кои редовно вежбале подолг временски период. Секако, неопходно е да се консултира со лекар пред почетокот на спроведувањето на програмот на вежби, како би се утврдило дека не може да дојде до појава на никакви контраиндикации.
Најдобро време да се стекне кондиција е пред жената да забремени, но не е доцна да се почне со вежби ниту во деветиот месец од бременоста.
Кога станува збор за вежбање во текот на бременоста, мислењата на стручњаците се поделени бидејќи за време на вежбањето доаѓа до зголемување на телесната температура. Телесна температура која надминува 39 степени во раната бременост може да го оштети развојот на фетсуот или да го забави неговиот раст во подоцната бременост.
Водата е подобар спроводник на топлината од воздухот, па лекарите на трудниците им советуваат лесно пливање. Пливањето во вода со вообичаена температура доведува до помало зголемување на телесната температура и е дефинитивно најдобриот избор на физичка активност за трудниците.
Набрзо по почетокот на активноста ќе забележите и реакција на бебето. И тоа ќе почне поинтензивно да се движи и ќе се зголеми и бројот на неговите срцеви отчукувања. Имајте на ум дека физичката активност мора да биде прилагодена на бременоста, а тоа значи не предолга, не преинтензивна, постапна и редовна (3-4 пати неделно).
Вежбите кои изискуваат премногу истегнување треба да се избегнуваат, како и активности кои вклучуваат скокање и брзи промени на положбата на телото.
ПОСОВЕТУВАЈТЕ СЕ СО ЛЕКАР
Доколку почувствувате вртоглавици, силно чукање на срцето, недостаток на воздух, болка посебно во долниот дел на стомакот, контракции на матката, крварење, губење на плодовата вода или намалување на бројот на феталните движења, треба веднаш да прекинете со вежбање и да се јавите кај својот матичен гинеколог. Но, треба да се нагласи дека компликациите се ретки ако физичката активност се прилагоди на состојбата.
