Бебињата многу сакаат да се гушкаат и се најслатки на светот. Меѓутоа, ако сте родител, голема е веројатноста дека имате барем еден традиционален роднина кој постојано ве предупредува да не го земате вашето бебе премногу често бидејќи ќе го разгалите. Повеќето современи родители не прифаќаат такви совети, а сега постои научна основа која не ги поддржува вашите традиционални роднини.
Новите истражувања покажуваат дека не постои такво нешто како пречесто или претерано држење на бебето – всушност, тоа е добро за нив.
Истражувањето, спроведено во Nationwide Children’s Hospital во Охајо, покажало дека допирот е клучен дел од развојот на бебето и всушност има сериозни придобивки. Истражувачите спровеле студија на 125 доенчиња, од кои некои биле предвремено родени.
Она што го откриле е дека предвремено родените бебиња послабо реагираат на допир од другите. Но, интересно е тоа што предвремено родените бебиња кои биле нежно допирани почесто од нивните родители и старателите во болница имале посилни реакции од предвремено родените бебиња кои не биле толку често допирани или држени во прегратка. Истражувањето исто така покажало дека децата кои имале болни медицински процедури во нивните најрани денови имаат тенденција послабо да реагираат на допир.
Значи, што значи сето тоа?
Според д-р Натали Мејтре, водечки научник на истражувањето, тоа значи дека допирот всушност има траен ефект врз мозокот на бебињата, што исто така може да влијае на нивниот когнитивен развој, комуникација и однесување подоцна во животот.
„Нашите резултати говорат дека изложеноста на допири полни со поддршка всушност може да влијае на начинот на кој мозокот го обработува допирот, сензација која е потребна за понатамошно учење и социјално-емоционалната поврзаност“, вели д-р Маитре.
Идејата дека може да се „расипе“ дете со пречесто држење е стара со децении. За среќа, повеќето родители не го следат овој совет. Инстинктот за допирање, држење и гушкање на бебето е толку силен, а како што докажува ова истражување, постои важна причина за тоа. Нежните допири и прегратки буквално го обликуваат начинот на кој бебињата ќе го искусат и ќе реагираат на светот околу нив. Затоа, следниот пат кога другите ќе ви кажат дека премногу често го држите вашето бебе, бидете сигурни дека всушност го правите токму она што му треба на вашето бебе.
