Децата поголем дел од времето го минуваат седејќи. Следањето телевизија и играњето игри се нивна омилена активност, кои ги држат седнати на столица или кревет, затворени во четири ѕида.
Токму поради недоволното движење, се повеќе расте бројот на обезни деца, па во пораст е дијабетесот тип 2, кој некогаш се јавувал дури по 40. година. Поради тоа, стручњаците препорачуваат децата помлади од две години воопшто да не гледаат телевизија, а на постарите времето да им се ограничи на 30 до 45 минути на ден. Исто така, тие велат дека е добро да се воведе и ден без екрани.
Дури и кога времето надвор не дозволува излегување, постои можност преку разни заборавени игри, децата да бидат физички активни и без екрани и во домот. Криенка, криење предмет, пикник со омилените играчки, цртање, играње со пластелин.
Во пролетните и летни денови се што треба да направите е да му овозможите на детето да трча во парк. Тоа го зајакнува срцето и ја подобрува способноста на телото на клетките да им го достави потребниот кислород.
За детето да биде посилно и поздраво, доволно е да се качува на сите реквизити кои се на игралиште или по дрва, секако со надзор од родителот. На тој начин се јакнат мускулите и се зголемува нивниот тонус. Опуштена игра и слобода на движење е се што му треба на детето. На тој начин, потенцираат лекарите, ќе бидат и поздрави и посреќни, подобро ќе спијат, соработуваат и ќе имаат помалку изливи на бес.
