Едно од највообичаените, а често и најмногу фрустрирачко прашање што го слушаат мајките на бебињате: „Дали бебето спие цела ноќ?“ Меѓутоа, ново истражување сроведено на Универзитетот Мекгил открило дека родителите не треба да се грижат ако нивното бебе не спие цела ноќ на шест месеци, па дури ни со една година.
Истражувањето кое наскоро ќе биде објавено во научното списание Pediatrics, открило дека голем процент здрави и развојно нормални бебиња не спијат цела ноќ до својата прва година и, без разлика на тоа, немаат зголемен ризик од побавен когнитивен развој, развој на говор или моторни вештини.
„Кога би можела да им кажам само една работа на родителите, тоа би било да не се грижат доколку нивното бебе сè уште не спие цела ноќ“, вели авторката на студијата Мари-Хелене Пенестри.
Спиењето во текот на ноќта, или консолидацијата на спиењето, се дефинира како шест до осум часа непрекинат сон. Резултатите од истражувањето покажале дека 38 отсто од шестмесечните бебиња не спијат по шест часа одеднаш, а повеќе од половина – 57 отсто од нив не спијат по осум часа одеднаш. На 12 месеци, 28 проценти од бебињата сè уште не спиеле шест часа одеднаш, а 43 проценти од нив не спиеле осум часа без прекин. Затоа, ако вашето бебе сè уште не ја преспало цела ноќ, знајте дека не сте единствените.
