Најдобриот начин да се намали ризикот од сезонски грип и можните сериозни компликации е вакцинацијата секоја година. Покрај тоа, превентивните мерки како избегнување на болни лица, покривање при кашлање и често миење на рацете помагаат да се спречи ширењето на микробите и да се намалат респираторните инфекции како грипот. Корисно е и да се преземат чекори за почист воздух и редовна хигиена на површините што често се допираат.
Овие совети ќе ви помогнат да се заштитите себеси и другите од грип и да го намалите ширењето на микробите.
Избегнувајте близок контакт. Избегнувајте блиска средба со луѓе кои се болни. Кога вие сте болни, држете дистанца од другите за да ги заштитите од зараза. Физичката оддалеченост може да помогне да се намали ризикот од ширење на респираторен вирус.
Останете дома кога сте болни. Доколку е можно, останете дома од работа, училиште и секојдневни обврски додека сте болни. Можете да се вратите на вообичаените активности кога се исполнети двата услови:
- симптомите се подобруваат, и
- немате температура (и не користите лекови за нејзино намалување).
Дури и потоа, можете да преземете дополнителни мерки за да ги заштитите другите од зараза.
Покријте ја устата и носот. Покријте ја устата и носот при кашлање или кивање. Така ќе ги заштитите луѓето околу вас од инфекција. Се смета дека вирусот на грип најчесто се шири преку ситни капки што се исфрлаат кога заразен човек кашла, кива или зборува. Носењето маска е дополнителна превентивна мерка – кога ја носи болната личност, таа ја намалува можноста да ги зарази другите, а истовремено штити и од вдишување заразни честички.
Мијте ги рацете. Честото миење на рацете е еден од најдобрите начини за заштита од микроби. Ако нема сапун и вода, користете средство за дезинфекција на база на алкохол.
Избегнувајте допирање на очите, носот и устата. Микробите можат да се пренесат кога ќе допрете контаминирана површина, а потоа лицето.
Обезбедете почист воздух. Подобрете го квалитетот на воздухот со редовно проветрување, користење прочистувачи на воздух или со престој на отворено. Почистиот воздух го намалува ризикот од изложеност на вируси.
Практикувајте добра хигиена и здрави навики. Редовно чистете ги површините што често се допираат – како маси, рачки и прекинувачи. Тоа помага да се спречи ширењето на инфекции.
Дополнително, грижете се за имунитетот: спијте доволно, бидете физички активни, намалете го стресот, пијте доволно течности и хранете се здраво, се препораките на Американскиот центар за контрола и превенција на болести (CDC).
