Кога ќе слушнете дека вашето дете удрило друго дете, главно доживувате благ шок. Ако сте родител кој ги воспитува децата исправно, не трпите насилство и сте уверени дека вашето дете не прави такви работи, сигурно реченицата “Вашиот син го удри мојот“ во парк, може да ве исфрли од колосек.
Па, почнувате да размислувате: моето дете не гледа никој кој тепа друг, знае дека тоа е лошо, не му дозволувам да гледа насилни цртани, внимавам на тоа, му давам љубов, му зборувам внимавам, воспитувам… Па, добро тогаш, зошто удрило друго дете? И тука почнува вината. А, заедно со неа почнува и стравот од уште полошо однесување кое би можело да се појави во градинка, па во училиште…
Но, вината не е ваша. Ако правите се како што треба, нема страв дека од тоа се ќе стане полошо и дека тоа се случило поради ваша постапка. Мал е бројот на деца кои никогаш во своето детство нема да удрат друго дете, порано или подоцна. Секако, тоа што е вообичаено, не значи дека ќе му дозволите тоа да го прави и да оставите да заборави кога тоа еднаш ќе се случи, бидејќи така на детето му давате до знаење дека тоа е во ред, а тоа не е она што го сакате.
ЗОШТО ДЕЦАТА УДИРААТ
Иако родителите можеби мислат дека детето само поради нешто „ги изгубило нервите“ или се налутило , па претерано реагира, удирањето е всушност нездрава форма на комуникација. Понекогаш тој удар е знак дека детето не развило посоодветни алатки за комуникација. Понекогаш им е тешко да ги контролираат своите емоции, па всушност така реагираат наместо да користат зборови.
Всушност не е премногу важно дали детето можело некаде да го види или доживее тоа, па сега удира други, бидејќи тоа не е насоката во која сакате да се движите во решавањето на овој проблем. Ниту, пак, целта е да се намали важноста на удирањето кај децата. Едноставно, не треба веднаш да паничите, туку полека да се обидете да го решите проблемот.
Како да реагирате кога вашето дете удира
Ако вашето дете само повремено удира друго дете, важно е да останете смирени кога тоа ќе се случи за ситуацијата да не се влоши, а во исто време, детето од прва рака да види како е да се остане смирен среде ситуација која е се, само не мирна.
Ако ја набљудувате оваа ситуација, важно е да бидете цврсти, но со смирен тон да кажете нешто едноставно како „застани“, „рацете кон себе“ или „без удирање“. Потоа дајте му шанса на детето да проба да направи нешто поинаку, како на пример користење зборови за да идентификува што го налутило или испровоцирало. И не, не очекувајте или не го присилувајте вашето дете веднаш да се извини, особено ако се работи за дете под две години.
Ако забележите дека вашето дете почесто ги удира другите, не е лошо да разговарате за тоа со експерт – во градинка, училиште или на друго место.
Што да направите кога вашето дете ќе добие удар
Постои голема веројатност дека вашето дете во одреден момент ќе прими удар. Кога тоа ќе се случи, важно е да покажете сочувство и емпатија, фокусирајќи се на чувствата и благосостојбата на вашето дете. Потврдете ги чувствата на вашето дете и дајте му до знаење дека удирањето не е соодветна реакција. Кога се работи за доволно мали деца, кои не можат да го разберат значењето на извинувањето, одлична идеја е да им се даде можност да го „повторат“ она што довело до ударот – но само ако процените дека е соодветно и дека ќе биде добро прифатено од другата страна.
Ако родителот на детето што го удри вашето не ја сфати ситуацијата толку сериозно колку што би сакале, едноставно вие и детето тргнете се од тоа друштво, ако е можно. Ништо позитивно нема да произлезе од некаков емотивен испад во таква ситуација. Ако често се среќавате со другото дете и со родителот, тогаш можеби е добро да разговарате со родителот, но само кога ќе ги соберете мислите и кога децата не се во близина.
Запомнете дека како што вашето дете не е злобно кога удира некого, ситуацијата е иста кога станува збор за обратен случај.
