Ковид-19, грип и респираторен синцицијален вирус (РСВ) се појавија истовремено оваа година и тешко е да се разбере кој симптом на која болест се должи. Инфекциите, за жал, нудат слични симптоми, но сепак е важно да се разликуваат за да се започне навремено лекување и да се спречи ширењето на вирусот понатаму.
Kовид-19 дели некои симптоми со грипот, а тоа се треска, сува кашлица, болки во телото и замор, според Американскиот центар за контрола и превенција на болести. Меѓутоа, бројни симптоми на Ковид се променија со новите варијанти, но и поради стекнатиот имунитет. Течење на носот, главоболка и болки во грлото сега се првите чести симптоми на болеста, а губењето на мирисот и вкусот се јавуваат сè поретко. Грипот обично започнува со кашлица. Обичната настинка носи кивање, течење на носот и „воден“ поглед.
Луѓето кои имаат грип ќе ги забележат симптомите неколку дена по инфекцијата, кај Ковид ќе се развијат три до четири дена по инфекцијата, но некои луѓе ќе ги развијат и 14 дена по инфекцијата.
РСВ, кој најчесто ги погодува децата и постарите лица, често предизвикува благи симптоми како кашлица или течење на носот, а закрепнувањето е брзо. Но, оваа состојба може да доведе и до бронхитис или пневмонија. Секако дека е важно да се тестирате за да дознаете за кој вирус се работи, но постојат некои јасни симптоми кои можат да ви помогнат да дознаете од што боледувате.
ПОЗНАТИ И ЧЕСТИ СИМПТОМИ НА КОВИД
Заболените пријавуваат цела низа симптоми, кои можат да се појават од 2 до 14 дена од моментот на инфекција. Еве ги најчестите:
- висока температура, грозница
- главоболка
- сува кашлица
- болки во телото и мускулите
- замор
- затнат нос, течење на носот
- воспалено грло
- отежнато дишење, краток здив
СИМПТОМИ НА ГРИП
Често се јавуваат неочекувано, а луѓето кои се болни може да очекуваат да се појават некои од нив или сите:
- висока температура, грозница
- главоболка
- кашлица
- болки во грлото или мускулите
- замор
РЕСПИРАТОРЕН СИНЦИЦИЈАЛЕН ВИРУС (РСВ)
Во случај на РСВ, симптомите се појавуваат околу 6 дена по контакт со вирусот. Обично се работи за овие симптоми:
- ниска температура
- главоболка
- кашлица
- затнат нос
- губење на апетитот
- кивање
СИМПТОМИ НА ОБИЧНА НАСТИНКА
Симптомите обично достигнуваат максимум три дена по изложувањето на вирусот и вклучуваат:
- кашлица
- течење на носот
- воспалено грло
- кивање
„Можно е да се заразиме со неколку вируси истовремено“, посочува д-р Марк Гали, од „Калифорниската агенција за здравје и хуманитарни услуги“, кој објаснува: „Треба веднаш да побарате лекарска помош ако имате посериозни симптоми или ако мислите дека имате тројна инфекција. Овие симптоми вклучуваат отежнато дишење, постојана болка во градите, неможност за будење или промена на бојата на кожата или усните“.
