ПИШУВА: Прим. д-р Љиљана Којиќ
педијатар
Ако штотуку сте добиле бебе, кое е родено предвреме, веројатно сте преплавени од грижа, прашања и надежи. Еве неколку информации кои ќе ви помогнат да се справите полесно со сите предизвици
♦♦♦♦♦♦♦♦♦♦♦♦♦♦♦♦♦♦♦♦♦♦♦♦
Малото „пакетче“ што побрзало да се роди предвреме е благослов, како и секое друго бебе. Но, со себе носи специфичен сплет на околности на кои треба да се навикнете.
Во тек на наредните неколку недели ќе се навикнете на тоа како изгледа вашето бебе, што му треба и како да се грижите за него.
НЕ СТЕ ОСАМЕН СЛУЧАЈ
Предвременото породување може да биде трауматично, но многу мајки и татковци веќе поминале низ она низ коешто вие поминувате во моментов.
Прематуритетот и во светот, па и во нашата земја е растечки тренд. Лекарите во нашата земја имаат доволно искуство со овие бебиња со децении наназад, а во последниве 15-16 години и со оние најмалите, под 28 недели. Бебето ви е во сигурни раце, убаво би било да ги замолите лекарите да ве запознаат со родители на нивните поранешни пациенти, кои можат да ви помогнат со споделување на нивното искуство.
Тешко е да се види вашето малечко приклучено на многу цевчиња, жици и апарати. Но сето тоа му помага на вашето бебе да го надмине прераното излегување во овој свет, му ја мониторира работата на срцето, крвотокот, температурата и работата на белите дробови
ДОБРИ ШАНСИ ЗА ПРЕЖИВУВАЊЕ
Благодарение на напредокот на медицинската наука, ако е родено над 28 недели бременост, вашето малечко има солидни шанси за преживување. А и под 28 гестациски недели нашите лекари успеваат да им помогнат на бебињата да преживеат и постојано се трудат да ја поместат границата подолу.
БЕБЕТО ИЗГЛЕДА МАЛКУ ПОИНАКУ
Изгледот на вашето недоносено бебе, фактот дека е ситно, и неговата кршливост, можат да ве вознемират. Ќе биде многу малечко, без масно ткиво и неговата глава може да ви изгледа преголема во однос на телото. Причината за тоа е што овие бебенца немаат масно ткиво, кое го пополнува бебето во последните недели од бременоста. Бојата на кожата може да ви изгледа црвеникава и проѕирна. Некои делови може да ви се чинат недоразвиени.
ГОЛЕМИНАТА И ЗРЕЛОСТА СЕ ВАЖНИ
Прогнозата на вашето бебе (ќе) зависи од многу фактори. Главно се базира на тоа дека на 28 недели гестациска старост (и повеќе) во Македонија има шанса за преживување. Шансата за преживување ќе биде поголема онолку колку што е повисока неделата од бременост во која е породено. Колку е помало и понезрело бебето, и ако е родено под 32 недели од бременоста, ќе му треба продолжен период на медицинска нега. Зрелоста на неговите органи е, исто така, клучен фактор за прогнозата (особено зрелоста на белите дробови). Колку што е позрело, толку се поголеми шансите за преживување. И уште еден фактор ќе влијае многу на вашето бебе: дали имало инфекција на раѓањето или не. Има и други, но ова се најчестите проблеми кои би влијаеле на преживувањето на бебето.
Предвремено роденото бебе ќе си оди дома кога ќе може да дише само, да ја одржи својата телесна температура и да цица или да пие од шишенце
ПОТРЕБНИ СТЕ МУ НА ВАШЕТО БЕБЕ
Сите бебиња, но особено предтерминските, напредуваат од допирот на родителите. Затоа „кенгурирањето“ (ставање на бебето на градниот кош на мајката) е нешто што позитивно влијае на неговата физиолошка стабилност, будност, успех во доењето (ако е позрело, и ако неговата состојба тоа го дозволува) и на поврзувањето помеѓу вас и него.
Ако тоа не е можно, замолете ги сестрите во единицата за интензивна нега да ви дозволат да ве држи за прст. Вашето бебе има потреба од вашата љубов и контакт со Вас.
Обидете се да бидете инволвирани во грижата за вашето бебе. Измијте ги рацете „хируршки“ (сестрите и лекарите ќе ви покажат како) за да го заштитите вашето бебе од инфекција. Овие бебиња се особено подложни на инфекции. А потоа допирајте го нежно по стапалцата и рачињата.
БОЛНИЦАТА Е ДЕЛ ОД ВАШИОТ ЖИВОТ
Вашето недоносено најверојатно ќе биде примено во новороденечката единица за интензивно лекување, каде што ја има сета потребна опрема за преживување на вашето малечко, како и експертски тимови од лекари и сестри, под чие будно око ќе биде вашето бебе. Тоа е чудна околина, делува помалку застрашувачки со придушените светла и чудните звуци. Тешко е да се види вашето малечко приклучено на многу цевчиња, жици и апарати. Но сето тоа му помага на вашето бебе да го надмине прераното излегување во овој свет, му ја мониторира работата на срцето, крвотокот, температурата и работата на белите дробови.
Колку ќе биде во интензивната единица? Индивидуално е и зависи, како што споменав, од повеќе фактори. Поголемиот дел од бебињата ќе бидат таму до нивниот вистински термин за раѓање. Предвремено роденото бебе ќе си оди дома кога ќе може да дише само, да ја одржи својата телесна температура и да цица или да пие од шишенце.
(продолжува)
