ПИШУВА:
Прим. д-р Љиљана Којиќ
педијатар
♦♦♦♦♦♦♦
КАКО ДА ЈА ОДРЖИМЕ ТЕЖИНАТА НА БЕБЕТО ВО ЗДРАВИ ГРАНИЦИ
Има нешто волшебно во буцмастите бебиња. Раката како сама да ни оди кон нивното заоблено обравче, да го погалиме или штипнеме.
Тежината на бебето кај нас долго време била табу тема, и во популацијата, и помеѓу лекарите. Тоа делумно се должи и на традиционалната балканска култура во која буцкастото бебе е синоним за добро здравје. Но се поголем е бројот на млади родители, кои се информирани за ризиците на дебелината.
И затоа последниве години се почесто почнувам да ја слушам реченицата: „Докторка, дали моето бебе е дебелко“?
Кои се просечните тежини за бебе од 0-12 месеци?
Ако вашето бебенце благо отстапува од вредностите во оваа табела и има околу еден килограм повеќе или помалку, грубо пресметано – немате особена причина за загриженост. Доколку тежината, од оваа во табелата е поголема за повеќе од 1 кг, можеби треба да поразговарате со вашиот педијатар.
Поради големата важност од мастите, како еден од главните нутриенси во овој период, мислам дека не постои педијатар кој ќе ви препорача каква и да е диета. Имено, не се практикуваат диететски режими кај деца под две години.
Што можете тогаш да направите за да ја контролирате тежината на вашето бебе?
-
Доите. Доењето е превенција од прекумерна тежина кај бебињата во однос на бебињата кои се хранат со млечна формула.
-
Скратете ја должината на подојот. Доколку доите, но вашето бебе, сепак, има поголема тежина од очекуваната на 6-месечна возраст, скратете го времето на подојот, нека не трае подолго од 10 минути во никој случај, затоа, прекинете го.
-
Не реагирајте на секој плач со нудење да цица или храна. Голем број бебиња бараат да цицаат и кога не се гладни. Цицањето е праисконски начин со кој вознемирено бебе бара да се смири. Затоа, обидете се да најдете алтернативен начин за смирување (цуцла лажливка, глодалка, транзициски објект-мече, играчка) сменете пеленка, играјте со него… И се разбира многу гушкање и тивко зборување со нежен глас.
-
Воведете цврста храна рано. Не чекајте да поминат 6 месеци. Сторете го тоа по навршени 4 месеци. Воведете најпрвин зеленчуково пире, потоа овошно пире, па на крај житарки. Не додавајте сол, особено не шеќер во храната на бебето. И не додавајте житарки во зеленчуковиот и овошниот оброк.
-
Давајте му на бебето здрава храна. Сокови и зашеќерени пијалаци не се даваат на бебиња под 12 месеци. Ако сакате да му дадете витамини од овошјето, направете му овошен оброк. Многу покорисно е да го изеде целото овошје, сосе пулпата и сите хранливи состојки, отколку да го пие само сокот, кој содржи витамини, но не содржи влакна и други хранливи состојки, содржи шеќери. Готови сокови со додатен шеќер не се опција за бебе. Ако му давате „грицкалки“ за ужинка, тоа нека биде парче бланширан морков, или карфиол, или јаболко (круша). Во никој случај не смее да биде смоки или чипс, а избегнувајте и бисквити. Наместо сок, дајте му вода.
-
Не го „претупанувајте“ и „клукајте“ бебето. Бебето само покажува знаци на ситост. Понекогаш нема да го допие целото млеко од шишенцето и нема да изеде се што сте му ставиле во чинија. Следете ги овие сигнали на ситост на бебето.
-
Започнете со фамилијарен оброк: Штом е спремно да седи во столче за хранење, ставете го бебето со вас на маса кога ручате вие, возрасните. Студиите покажуваат дека кај бебиња, кои јадат заедно со своите родители, помала е веројатноста да имаат прекумерна тежина на крајот од првата година.
-
По завршениот цврст оброк понудете му вода, а не да цица или млеко. Цврстиот оброк е оброк, а и цицањето е оброк. Тоа значи дека ако по цврстиот оброк сте му дале да цица, или формула – вие фактички сте му дале два оброка. А тоа не е потребно. Цицањето не смее да биде награда за изедената храна.
-
Активност: Смислете му игри во кои нема да лежи свиткано како во мешунка, туку ќе се движи што е можно повеќе, и ќе има физичка активност.
-
Консултирајте го вашиот педијатар, побарајте од него да ви направи перцентилна крива на растење и да пресмета БМИ на вашето бебе, и договорете со него што уште можете да правите.
Сево ова е инвестиција во идните здрави прехранбени навики, и воопшто, во идното здравје на вашето бебе.
◊◊◊◊◊◊◊
ПОВЕЌЕ ОД ИСТИОТ АВТОР, ПРИМ. Д-Р ЉИЉАНА КОЈИЌ:
- МРСАТА НЕ Е ЕБОЛА! Одбраната на едно дете од МРСА инфекција е добро информиран родител
- По навршени шест месеци бебето нема потреба од ноќен подој
- Температура од инфекција кај здраво дете не може да доведе до оштетување на мозокот
- УВБ зраците се главен виновник за настанок на рак на кожата
- ПРЕМАЛО Е И НЕМОЌНО – Ако бебето упорно плаче не се обидувајте да го дисциплинирате, туку понудете му утеха
- Се менува сликата за тежината кај бебињата – БУЦМАСТО БЕБЕ (ПОВЕЌЕ) НЕ Е СИНОНИМ ЗА ЗДРАВЈЕ
- Интервју со прим. д-р Љиљана Којиќ: Предвремено родените деца растат малку побрзо од врсниците и ги стигнуваат
- Бебешката кожа е нежна, но не е чиста, затоа бебето треба да се бања секојдневно
- Нема среќно бебе ако мајката е несреќна и преморена
- Глад, престегната пелена, грчеви, никнување на запчиња, „скок во растењето“- причини за силен плач кај малите бебиња
- МОРБИЛИТЕ НЕ СТИВНУВААТ. Жени кои планираат бременост не би смееле да останат бремени 4 недели по примање на ММР вакцина
- Како да одбегнете амонијакален дерматит кај бебето
- РОДИТЕЛИТЕ ПРАШУВААТ, ПЕДИЈАТРИТЕ ОДГОВАРААТ… Тазе прележана варичела не е пречка за вакцинирање со ММР
- Oдбраната од инфекции скоро и да не постои кај предвремено родените деца
- Секогаш ставајте го бебето да спие на грб
- Што треба да знаете ако сте родители на предвремено родено бебе? (1)
- Не го споредувајте вашето прематурче со бебињата-врсници на вашите пријателки кои се термински зрели новороденчиња (2)
