Белградската професорка д-р Ана Глигиќ, истакнат виролог и докторка која во 1972 година го потврди првиот случај на Вариола вера во тогашна Југославија и како микробиолог го потврди првиот Марбург вирус, во интервју за српска Прва ТВ зборуваше за вакцината против коронавирус, која е регистрирана во Русија, но и за тоа дека коронавирусот нема никогаш да исчезне со оглед на тоа што неговиот резервоар се лилјаците, односно има природно жариште.
- Русија неодамна ја регистрираше првата вакцина во светот против коронавирус. Дали е безбедна и дали ќе биде ефикасна?
„Во оваа вакцина, руските научници, заедно со Путин, го вложија своето „јас“. Мора да веруваме во она што тие го кажуваат, иако многу малку знаеме за неа. Единствено знаеме дека е направена на еден безопасен аденовирус, кој предизвикува обична настинка кај луѓето“, вели вирологот проф. д-р Ана Глигиќ.
„Тие искористиле ослабен вирус, во кој вградиле дел од сегашниот коронавирус, кој ќе обезбеди создавање на антитела, а нема да му наштети на организмот. Според тоа, оваа вакцина е, всушност, генетски модифицирана“, објаснува професорката.
Како што вели проф. д-р Глигиќ, главната улога на вакцината е да ја запре инфекцијата, да се имунизира населението и да се сведе короната на минимум – за да не се појавува повеќе во епидемиска и пандемиска форма. „Нема да ја искорениме, но би требало да достигнеме имунитет до 60% на глобално ниво, а тоа ќе го достигнеме“.
Ако вирусот потекнуваше од лабораторија, за овие осум месеци некој веќе ќе се пофалеше со резултат. Точно е дека малку се знае за вакцината, меѓутоа не би требало да се зборува за престиж
„Прочитав дека вакцината дава имунитет две години. Тоа е невозможно да се каже, затоа што само осум месеци знаеме за овој вирус. Но, ако руските научници работеле на SARS, па ги замрзнале истражувањата, тие би можеле да ги продолжат. Затоа толку брзо можеа да кажат за времетраењето на имунитетот, ефикасноста и безбедноста на вакцината“, додава проф. д-р Глигиќ.
Таа, исто така, објаснува дека би требало долго време да се работи за оваа вакцина, но не колку за класичните, за кои се потребни околу три години. Таквите класични вакцини минуваат низ големи истражувања, но може да траат и цел живот.
Професорката истакнува дека вирусот потекнува од природно жариште, така што не може никогаш потполно да исчезне. Коронавирусите постојат во природата во различни форми, а резервоар се лилјаците.
„Ако вирусот потекнуваше од лабораторија, за овие осум месеци некој веќе ќе се пофалеше со резултат. Точно е дека малку се знае за вакцината, меѓутоа не би требало да се зборува за престиж. Оваа вакцина се дава во две дози, што значи 14 милијарди дози се даваат на планетата. Има простор за сите производители“, објаснува таа.
- Колку е важно тоа што вакцината е доброволна?
„Многу е важно. Кога би оделе на задолжителна вакцинација, а кај некои групи се појават компликации што немаат никаква врска со вакцината, може да и се препишат на неа. Предвидено е во почетокот малите деца да не ја примаат вакцината, бидејќи имаат наследен имунитет“, објаснува д-р Глигиќ.
Докторката не смета дека вакцината е опасна за здравјето на луѓето, затоа што не верува дека руските научници и претседателот Владимир Путин би го ризикувале сопствениот углед. Како што вели, треба да примите вакцина против коронавирус, но и вакцина против грип, затоа што не би било добро да се здружат грипот и коронавирусот – тогаш би можело да дојде до компликации. (Б92)
