Ротавирусот е честа причина за гастроентеритис, кој често се нарекува и стомачен грип, а се работи за вирус што ги напаѓа цревата и желудникот. Предизвикува повраќање и пролив, особено кај бебињата и малите деца. Инфекциите се чести во текот на зимските и пролетните месеци, особено во детските колективи.
Знаците и симптомите на ротавирус вклучуваат треска, мачнина и повраќање, стомачни грчеви, чест и водлест пролив. Покрај цревните проблеми, може да се појават и респираторни проблеми, како што се кашлање и течење на носот. Меѓутоа, како и кај сите вируси, некои ротавирусни инфекции предизвикуваат мали или никакви симптоми, особено кај возрасните.
Понекогаш дијареата кај децата е толку силна што може да предизвика дехидрација, што е исклучително опасно, а вообичаени знаци на дехидрација се жед, замор, нервоза, вртоглавица, сува уста и јазик и ретко мокрење.
- Колку е заразен ротавирусот?
Вирусот се наоѓа во столицата (изметот) на заразените лица и лесно се шири. Децата може да се заразат со ставање на прстите во устата по допирање на контаминирана површина. Ова обично се случува кога не ги мијат рацете, особено пред јадење и по користење на тоалет.
Децата може да се разболат и ако јадат храна или пијат вода во која се наоѓа вирусот, па затоа е многу важно лицето што ја подготвува храната редовно да ги мие рацете.
- Како се дијагностицира ротавирусот?
Лекарите обично можат да утврдат дали некој има стомачен грип според симптомите и не се потребни никакви тестови. Ако детето е многу болно или има крв или слуз во столицата, може да се направи анализа на столицата за да се провери дали покрај ротавирусот има и други бактерии кои предизвикуваат дијареа. Лекарот може да побара и анализа на урината или крвна анализа за да ја провери состојбата на организмот и дали дошло до дехидрација.
- Како се лекува?
Во случај на дехидрација, на бебињата и малите деца можно е да им е потребно болничко лекување и инфузија за да нивоата на телесни течности и соли се вратат во нормала. Повеќето постари деца може да се лекуваат дома, но по совети и препораки на педијатар.
