Новиот бран на коронавирус трае и кај нас и во светот, а сето тоа поради соевите на омикрон BA.4 и BA.5, кои вешто го заобиколуваат имунитетот, како на вакцинираните, така и на оние кои го прележале вирусот.
Најновите подваријанти на вирусот се покажаа како попреносливи од нивните претходници и покрај големиот број вакцинирани луѓе.
Расте бројот на луѓе кои пријавуваат дијареја како симптом на инфекција со коронавирус
Симптомите на вирусот се нешто поблаги отколку кога започна короната, а во новиот бран еден симптом е често пријавуван, пренесува британски „Експрес“.
Апликацијата ZOE Health Study, основана од тим на истражувачи во Велика Британија, која ги следи симптомите на болните, откри дека дијарејата е многу често пријавуван симптом на новиот сој на корона. Има зголемување на бројот на луѓе кои пријавиле дијареја како симптом на инфекција.
„Дијарејата може да биде ран знак на Ковид, кој започнува на првиот ден од инфекцијата и се зголемува во текот на првата недела. Обично трае два до три дена, но кај возрасните може да трае и до седум дена“, велат од тимот на ZOE Health Study app.
Оттаму додаваат дека иако се чини дека дијарејата е поретко застапен симптом со секоја нова варијанта на вирусот, таа сепак е многу честа и може да биде еден од раните показатели на инфекција.
За време на првиот бран кога беше застапен алфа сојот на вирусот, речиси една третина од возрасните пријавија дијареја како симптом на инфекција со Ковид-19.
