ПИШУВА: Прим. д-р Љиљана Којиќ
педијатар
♦♦♦♦♦♦♦
Дали вакцината против морбили е „жива“ вакцина?
Да. Вакцината против морбили содржи живи, но атенуирани (ослабени) вируси против морбили, заушки и рубеола.
Дали лице што примило вакцина против морбили е заразно за околината и дали е закана за моето бебе?
Не.
Ако јас и постарото дете се вакцинираме, дали сме заразни за бебето?
Не. Вирусот на морбили во вакцината е ослабен така што не може да предизвика зараза. Негова задача е да предизвика имун одговор на организмот и да го поттикне да создаде антитела, кои вакцинираниот ќе го заштитат од заразување со морбили, заушки и рубеола. Значи, и вие и постарото дете, по примањето на вакцината можете безбедно да бидете во близина на бебето.
Американскиот ЦДЦ не препорачува одложување на вакцинацијата ако детето ви заболело од варичела. Иако кај нас некои непишани препораки ќе речат да се почека 4-6 недели по прележување на инфекцијата, за таков став нема научен доказ. Дотолку повеќе што во САД вакцината ММР се дава како ММРВ (морбили-заушки-рубеола-варичела)
Дали смеам да го дојам моето бебе ако се вакцинирам против морбили?
Да. Вакцината против морбили не е никаква пречка за доење, ниту пак вакцинирана мајка претставува ризик за доенчето и за процесот на доење.
Што ако детето ми дојде во контакт со морбили? Дали ќе се зарази?
Најверојатно да. Вирусот на морбили е со 100% контагиозност.
Колку дена личноста која има морбили е заразна?
Четири дена пред до четири дена по избивање на исипот. Значи нешто повеќе од една недела.
Дали ако еднаш сум имал/а морбили можам пак да се заразам?
Не. Преболувањето на морбили остава траен имунитет.
Вакцината против морбили не е никаква пречка за доење, ниту пак вакцинирана мајка претставува ризик за доенчето и за процесот на доење
Мајка ми не памети дали сум вакциниран/а против морбили, а немам вакцинален картон. Дали ќе биде штетно да примам вакцина, ако сум веќе вакциниран/а?
Не. Нема никаква штета да примите уште една доза вакцина против морбили.
Како да знам дали сум вакциниран/а? Постои ли тест со кој може да се утврди дали имам антитела против морбили?
Да, постои. Во Заводите за јавно здравје и во поголемите приватни лаборатории има тестови кои ќе покажат дали имате антитела против вирусот на морбили. Ќе имате ИгГ антитела против вирусот на морбили.
Дали има начин преку крв да се утврди дали сум дошол во контакт со вирусот на морбили и дали можеби веќе сум заразен?
Да. Истите тестови обично одредуваат и ИгМ антитела, кои се знак на неодамнешна инфекција со морбили.
*Овие антитела од класата ИгМ ќе бидат позитивни и ако сте се вакцинирале неодамна.
Настинка со растечен нос НЕ е пречка за вакцинирање
Што ако моето дете е веќе заразено, а се уште нема исип? Дали ќе му пречи да ја прими вакцината? Дали ќе биде многу поболно ако е веќе заразено?
Не. Напротив, доколку вакцината ја прими 72 часа по контактот со инфицираното лице, добри се шансите дека вакцината ќе ја спречи појавата на болеста.
Дали настинка со растечен нос е пречка за вакцинирање?
Не.
Дали скорешна прележана варичела (овча сипаница) е пречка за вакцинирање?
Не. Американскиот ЦДЦ не препорачува одложување на вакцинацијата ако детето ви заболело од варичела. Иако кај нас некои непишани препораки ќе речат да се почека 4-6 недели по прележување на инфекцијата, за таков став нема научен доказ. Дотолку повеќе што во САД вакцината ММР се дава како ММРВ (морбили-заушки-рубеола-варичела).
Дали алергијата на јајце е пречка да се прими оваа вакцина?
Не. Луѓето (и децата) кои се алергични на јајце се всушност алергични на протеините на белка од јајце. Во вакцината, за раст на вирусите се користат сврзни клетки од пилешки ембрион (жолчка).
Дали детето треба да е постаро од 6 месеци (или народски кажано „да пркне малку“) за да се вакцинира?
Не. Ако вашето дете е терминско дете и не примало скоро трансфузија или некој друг крвен дериват, не треба да ја одложувате вакцинацијата. Со тоа само го изложувате на ризик да заболи од некоја од детските заразни болести. (Не се само морбилите проблем, минатата година се забележани неколку случаи на црна кашлица). Значи дете од 6 месеци би требало да е веќе вакцинирано против ТБЦ, Хепатитис Б и да ги има примено сите три дози Ди Те Пер Полио.
Дали поместувањето на границата за ММР вакцина од 12 на 6 месеци е ризично?
Јас не сум имунолог, но моите колеги имунолози, инфектолози и епидемиолози велат дека е безбедно, а јас им верувам.
Докторка, дали Вие сте вакцинирани против морбили?
За жал не. Јас со имунитет против морбили се стекнав на потешкиот начин… Во времето кога јас сум родена ММР вакцината не беше во вакциналниот календар на тогашната СФРЈ и не беше достапна за нас. Јас, иако сум уредно вакцинирана против сите други болести, за кои во тоа време постоеле вакцини (вакцинирана сум и ревакцинирана и против Вариола Вера), немав можност да ја примам оваа вакцина. Во Македонија, за жал, таа се појави многу години подоцна. Велам за жал, зашто прележав една од потешките форми на морбили на 3,5 годишна возраст. Тоа ми е едно од најтрауматските сеќавања од детството.
ПОВЕЌЕ ОД ИСТИОТ АВТОР, ПРИМ. Д-Р ЉИЉАНА КОЈИЌ:
- Oдбраната од инфекции скоро и да не постои кај предвремено родените деца
- Секогаш ставајте го бебето да спие на грб
- Што треба да знаете ако сте родители на предвремено родено бебе? (1)
- Не го споредувајте вашето прематурче со бебињата-врсници на вашите пријателки кои се термински зрели новороденчиња (2)
