Некое благо пореметување е тешко да се објасни кај бебињата кои се уште не зборуваат, а одредени пречки може мајката да ја исплашат без потреба. Понекогаш и постарите деца не се во состојба со зборови да ја искажат непријатноста или болката. Заота, родителите треба да ги познаваат симптомите и да научат кога може да делуваат сами, а кога треба да побараат совет или преглед кај лекар.
Ова се одредени симптоми кои ќе ги забележите кај децата. Што значат и како треба да се однесувате
Абдоминална болка
Децата често ги боли стомакот. Абдоминалната болка може да биде акутна и хронична. Детето кое го боли стомак, не треба да го терате да јаде, туку да пие многу течности. Ако болката трае подолго од три часа, побарајте лекар.
Абдоминалната болка може да биде симптом на воспаление на слепото црево, закрчени црева или инфекција на уринарниот тракт. При одредувањето на причината за болка важно е да обрнете внимание дали детето има висока температура, дијареа, констипација или губи од телесната тежина. Точната локација на болката, колку долго трае, како и од што чувствува олеснување, исто така се корисни информации за лекарот.
Кашлица
Кашлицата е симптом кој најчесто се јавува и при обична настинка. Некогаш може да биде знак и за сериозен проблем, особено ако детето има тешкотии со дишењето. Ако станува збор за обична кашлица, ќе му помогнете со влажност на воздуот, проветрена и незадимена просторија.
Отечени жлезди
Не е реткост, како последица од некоја инфекција, жлездите да отечат и направат топчиња најчесто на вратот на детето, но и на другите делови од телото. Лимфните јазли произведуваат антитела, па често отекуваат оние кои се близу до местото на воспалението.
Зголемената жлезда во подрачјето на вратот обичено е предизвикана од воспаление на грлото, забите, или инфекција во устата. Жлездите под пазувите отекуваат при воспаление во рацете. Отоци и жлезди може да се појават и од задната страна на главата, зад и пред ушите и на слабината. И самите лимфни јазли може да бидат воспалени. Тогаш многу брзо се зголемуваат, стануваат црвени и чувствителни. Отечените жлезди, ако нема црвенило и болка, најчесто не се загрижувачки и самите се повлекуваат. Ако детето има отечени жлезди по целото тело, висока температура, губи на тежина или ако жлездата не престанува да расте, задолжително одете на доктор.
Течење од носот
Покрај кашлицата, течењето од носот често е симптом за настинка. Неретко е предизвикан од алергии. Може да биде и воспаление на синусите.
Крварење од носот
Не е загрижувачки ако децата повремено имаат крварење од носот. Дури и кога се јавуваат секоја недела, ретко се знак за некој сериозен проблем. Се случува кога дишните патишта се суви и изритирани од алергија или инфекција. Во ретки случаи може да предизвика пореметување и згрутчување на крвта, но тогаш се јавуваат и други крварења. Во случај на крварење од носот, детето треба да се навали нанапред и цврсто да го притиснете долниот дел од носот. Стисокот нека трае десетина минути. Ако после ова не се сопре крварењето, отидете на лекар.
Главоболка
Главоболката е честа кај децата и адолесцентите и најчесто е поврзана со настинка или грип. Ретки, но сериозни случаи се менингитис и тумори во мозокот. Ако детето, покрај главоболката, често повраќа, многу е нервозно, збунето, летаргично, тешко дише, одбива храна и пијалоци, тешко оди, вратот му е вкочанет, треба под итно да побарате лекарска помош. Но, децата може да страдаат и од хронична главоболка.
Болки во градите
Кај децата болките во градите најчесто не е предизвикана од некој сериозен проблем. Ако детето покрај болка има и тешкотии со дишењето, чувствува дека срцето забрзано му чука, губи воздух или свест, итно побарајте доктор.
Дијареа
Еден од честите проблеми е дијареата (пролив), а најчеста причина за појава е стомачен вирус и тогаш е проследена со повраќање и покачена телесна температура. Важно е на докторот да му напоменете ако претходно некаде патувало детето. Наједноставните случаи поминуваат за неколку дена. Потребно е да внесува многу течности, а лекови не треба да им давате без препорака од лекар.
Болки во увото
Децата често се жалат на болки во ушите. Причина за ова се инфекции на средното или на надворешните уши, а може да биде и последица од забоболка, воспаление на грлото или вилицата.
Проблеми со очите
Може да бидат предизвикани од инфекции, иритација, алергија или проблеми со видот. При повреда на окото или проблем кој влијае на видот на детето, треба да се обратите кај офталмолог.
Висока температура
Ако не е многу висока, температурата најчесто не е опасна. Нормално е кај малите деца температурата преку денот да варира. Покачена температура не е болест, туку симптом на некоја болест, па ако е висока, секако однесете го на лекар.
Повраќање
Повраќањето е најчест симптом за стомачен вирус, со пролив и висока температура, како и од труење со храна. Може да биде и симптом на воспаление на слепото црево, кога се јавува со болки во долниот десен дел од стомакот. Важно е да внесува многу течности за да спречите дехидрација.
