Од ден на ден, се повеќе луѓе се вакцинираат низ целиот свет. Некои примиле само една доза, други две дози на вакцина, а некои сè уште ја чекаат својата доза.
Во зависност од тоа со која вакцина се вакцинирани првиот пат, граѓаните можат да ја очекуваат втората доза во период од три до 12 недели. Затоа, се поставува прашањето колку е ефикасна само една доза на вакцината, односно колкава заштита обезбедува таа.
Во зависност од тоа со која вакцина се вакцинирани првиот пат, граѓаните можат да ја очекуваат втората доза во период од три до 12 недели
Студијата, објавена во април, која сè уште чека рецензија, се базира на податоци собрани од 375.000 вакцинирани лица во Велика Британија.
Со анализа на податоците, истражувачите откриле дека една доза на вакцината Фајзер или АстраЗенека го намалува ризикот од развој на Ковид-19 со симптоми за 72 проценти, а заштитата би требало да трае до 10 недели.
Една доза на вакцината Фајзер обезбедува најмалку 80 проценти заштита од развој на симптоматски Ковид-19 и тоа 21 ден по вакцинацијата и 100 процентна заштита од хоспитализација и смрт
Авторите на студијата истакнуваат дека не треба да се одложува примањето на втората доза за повеќе од 10 недели, бидејќи податоците покажуваат дека после тоа се намалува нивото на антитела. По втората доза на вакцината на Фајзер, нивото на заштита се искачува на 90 проценти. Податоци за нивото на заштита по втората доза на вакцината АстраЗенека сè уште не се достапни.
Друга студија објавена во „Лансет“ наведува дека една доза на вакцината Фајзер во дури 91 процент од случаите спречува хоспитализација во рок од 28 до 34 дена од вакцинацијата. Една доза на вакцината АстраЗенека, во исти услови, е ефикасна во 88 проценти од случаите.
На ова треба да се додаде и третата студија која открива дека една доза на Фајзер или АстраЗенека е доволна за да се преполови ширењето на симптоматскиот Ковид-19 во рамки на домаќинството.
Вакцините штитат, но колку?
Колку точно штитат вакцините по примање на само една доза? Овие податоци се разликуваат од вакцина до вакцина, во зависност од тоа кога е измерена ефикасноста и под кои услови. Но, ако се потпреме на податоците од клиничките студии што компаниите ги доставиле до разни здравствени регулатори кога барале одобрување за употреба на вакцина, можеме да ја направиме следнава скала.
Една доза на вакцината Фајзер обезбедува најмалку 80 проценти заштита од развој на симптоматски Ковид-19 и тоа 21 ден по вакцинацијата и 100 процентна заштита од хоспитализација и смрт.
Авторите на студијата истакнуваат дека не треба да се одложува примањето на втората доза за повеќе од 10 недели, бидејќи податоците покажуваат дека после тоа се намалува нивото на антитела
Вакцината на Модерна во истите услови обезбедува најмалку 80 проценти заштита од развој на симптоматски Ковид-19, но не е јасно колку штити од хоспитализација и смрт затоа што имало премалку податоци.
Една доза од вакцината АстраЗенека обезбедува заштита повеќе од 70 проценти од симптоматскиот Ковид-19, додека заштитата од хоспитализација е 100 проценти. Оваа висока заштита трае до 90 дена по една доза, поради што треба да се прими втора доза во овој период со цел заштитата да биде продолжена.
Што се однесува до вакцината Џонсон и Џонсон, треба да се напомене дека оваа вакцина се дава само во единечна доза. Значајна заштита се создава 14 дена по приемот на вакцината, а по 28 дена истата изнесува 66,1 процент.
Иако овие податоци не се конечни, затоа што фармацевтските компании што ги направиле вакцините и понатаму следат што се случува со нив во реални услови, сепак покажуваат дека вакцинацијата е важна бидејќи обезбедува висок процент на заштита од развој на најтешки форми на болеста. Дури и ако некое лице е вакцинирано, а потоа заразено со коронавирус, симптомите на самата болест ќе бидат многу поблаги отколку кога не би било вакцинирано, без оглед за која вакцина станува збор, пишува „Бизнис инсајдер“.
