Децата на четиригодишна возраст, најчесто надвор од домот се предобри, додека дома стануваат непослушни. Инаку, за предучилишната возраст се вели „мал пубертет„, а сигурно досега и сте сфатиле зошто. Немирни, со „мравки„ во телото и неочекувани промени на расположението. За многу краток период, може од вриштење, лутина и нервоза, да станат ведри, среќни и добро расположени.
За децата и родителите овој период е прилично хармоничен. Децата се активни, љубопитни и забавни. Но, некаде на крајот на третата година, децата влегуваат во нов, поинтензивен развоен период и како и со сите досегашни развојни фази, ситуацијата станува тешка. Повторно се јавува борбата за моќ меѓу родителите и децата, и навидум малите неуспеси, може од детето да направат мало „чудовиште„. Сега не можете лесно да му го свртите вниманието на нешто друго, како што сте можеле кога имало две години.
Сигурна база
Четиригодишните деца имаат добра самодоверба и веруваат во своите способности. Светот се шири пред нивните очи и тие повеќе немаат постојана потреба од родителите. Но, она што секогаш им е потребно е сиигурна база во домот, каде може да дојдат без страв. Родителите може да забележат дека, во еден момент се големи и способни, а во следниот се мали мази. Ова е време на спротивности.
Пријателства
Пријателствата на оваа возраст стануваат се поважни. Децата учат да имаат повеќе разбирање, да соработуваат, да прават компромис, да си го чекаат својот ред, а стануваат и почувствителни – една до тогаш непозната особина. Често во светот на возрасните може да се забележи недостаток на овие клучни особни, кои , како што гледате, треба да се развијат уште во раното детство.
Стравови
Со оглед на тоа што децата разбираат се повеќе, тоа значи и подобро сфаќање на заканите и опасностите. Децата стануваат плашливи. Се плашат да одат сами во тоалет, а темницата и ноќните кошмари ги става на исто рамниште со мислите за смрт. Децата физички се доста менливи. Го снемува она округло лице на бебе и се претвора во дете кое ги контролира своето тело и движењата. Сакаат да вежбаат. Често може да се појават болки при растењето кои се сосема нормални и со време ќе поминат. Едноставно им е тешко да бидат на едно место, а повеќето родители токму тоа го бараат од нив.
